ՊՆ-ն իրեն ուղղված հարցումներին պատասխանում է զուտ պատասխանելու համար

Պաշտպանության նախարարությունը գերատեսչությանն ուղղված հարցումներին հիմնականում մերժում է պատասխանել՝ բերելով պատճառաբանություններ, որոնք նոր հարցերի տեղիք են տալիս։

Մի դեպքում ՊՆ-ից հայտնում են, որ պահանջվող տեղեկատվությունը պետական գաղտնիք է պարունակում, մյուս դեպքում նշում՝ գնահատական տալու ժամկետների խնդրի կամ հարցի անհասկանալի լինելու մասին։ Մինչդեռ, պարզվում է, ՊՆ-ի կողմից «պետական գաղտնիք» որակված տեղեկատվությունը հրապարակվել է հենց ՊՆ-ի կողմից։

«ՕՍԱ-ԱԿԱ»-ների մասին տեղեկատվությունը՝ պետական գաղտնի՞ք

Այսպես, Fip.am-ը ՊՆ-ից խնդրել էր հայտնել՝ 2020 թ․ սեպտեմբերի 27-ից  նոյեմբերի 10-ը ընկած ժամանակահատվածում պատերազմական գործողություններին «ՕՍԱ-ԱԿԱ» զենիթա-հրթիռային համալիր հայկական կողմը կիրառե՞լ է, թե ոչ։ Հիշեցնենք, որ ԶՈՒ Գլխավոր շտաբի նախկին պետ, գեներալ-գնդապետ Մովսես Հակոբյանը նոյեմբերի 19-ին հրավիրված ասուլիսին նշել էր, որ «ՕՍԱ-ԱԿԱ»-ները պատերազմի ընթացքում չեն կրակել։

Սակայն ՊՆ-ից պատասխանել են, որ հայցվող տեղեկատվությունը պետական գաղտնիք է։

Մինչդեռ, պարզվում է, նշված «պետական գաղտնիք» որակված տեղեկատվությունը հրապարակել է հենց ՊՆ-ն՝ անդրադառնալով Մովսես Հակոբյանի պնդումներին։ 

«Իրականությանը չի համապատասխանում նաև Մովսես Հակոբյանի այն պնդումը, թե «ՕՍԱ»-ները «չեն կրակել»։ Հաստատված թվերով՝ «ՕՍԱ»-ների կողմից խոցվել է հակառակորդի 62 ԱԹՍ։ Ի դեպ, Մովսես Հակոբյանը պետք է լավ հիշեր, որ հուլիսյան դեպքերի ժամանակ «ՕՍԱ»-ից էր խոցվել նաև իսրայելական արտադրության «Հերմես-900» գերթանկարժեք ԱԹՍ-ն»,- հայտարարության մեջ նշել էր ՊՆ-ն։ 

Վիրավորների թիվը՝ պետական գաղտնի՞ք

ՊՆ-ն մերժել է նաև տրամադրել 44-օրյա պատերազմում հայկական կողմի վիրավորների թիվը՝ նույն պետական գաղտնիքի հիմնավորմամբ։ Մինչդեռ, օրինակ, 2016 թ․ ապրիլյան քառօրյա պատերազմից երկու օր հետո ՀՀ ՊԲ-ն հրապարակել էր նշված տեղեկատվությունը՝ նշելով, որ հայկական կողմն ունեցել է 32 զոհ, 121 վիրավոր, 25 անհետ կորած։ 

Հայաստանի ոչնչացված կամ գրավված ռազմական տեխնիկայի գինը դեռ հաշվում են

Ադրբեջանի տնտեսական բարեփոխումների վերլուծության և հաղորդակցության կենտրոնի բաժնի ղեկավար Այազ Մուսեյբովը դեկտեմբերի 2-ին հայտարարել էր, որ Ղարաբաղյան երկրորդ պատերազմում Հայաստանի ոչնչացված կամ գրավված ռազմական տեխնիկայի գինը առնվազն 3․8 միլիարդ դոլար է։ Թե որքանո՞վ է այս թիվը մոտ իրականությանը՝ ՊՆ-ից պատասխանում են, որ ադրբեջանական կողմից հնչեցված վնասների չափերն իրականությանը չեն համապատասխանում։ Իսկ թե իրականությունն ի՞նչ է՝ վաղ են համարում գնահատական տալ։ 

Ի՞նչ է եղել օգնության  հետ 

Ինչ վերաբերում է ամերիկահայ բարերար Վարդան Մալխասյանի՝ ՊՆ-ին ուղղված մեղադրանքների մասին հրապարակումներին, որ 200,000 դոլարին համարժեք 2 տոննա օգնությունն անհետացել է, և հարցին, թե ի՞նչ ապրանքների մասին է խոսքը և արդյո՞ք դրանք օգտագործվել են ըստ անհրաժեշտության, ՊՆ-ից պատասխանում են, որ հարցն անհասկանալի է։ 

Նելլի Լազարյան