Քըրքորյանը երբևէ հրապարակային չի խոսել Քոչարյանի կողմից իր ներդրումները չարաշահելու մասին. Արշակյանը սխալվում է

ԱԺ «Քաղաքացիական պայմանագիր» խմբակցության պատգամավոր Հակոբ Արշակյանը խորհրդարանի դեկտեմբերի 4-ի նիստում անդրադարձել է ամերիկահայ մեծահարուստ Քըրք Քըրքորյանի՝ 2000-ականներին Հայաստանում արված ներդրումների ճակատագրին։ 

Նա, մասնավորապես, ասել է. «Ո՞նց են առաջացել էդ ընկերությունները (նկատի ունի պետական գնումների մրցույթներին մասնակցող), Լինսի հիմնադրամի փողերով բետոնե ճանապարհի տեղը, 3 մետրանոց ասֆալտի ճանապարհ սարքել։ Չգիտե՞ք ոնց եղավ, որ Քըրքորյանը նեղացավ. հայտնի ֆրազաներ ունի, բացեք՝ կարդացեք. էսօր չքմեղանում եք»։ 

Քըրք Քըրքորյանի ներդրումները ու չարաշահումների թեման  

Քըրքորյանի ամենամեծ նախաձեռնություններից մեկը 1990-ականներին հիմնադրված Լինսի հիմնադրամն էր, որի միջոցով ֆինանսավորվել են հարյուր միլիոնավոր դոլարների ծրագրեր Հայաստանի վերականգնման և զարգացման նպատակով։

Հիմնադրամի միջոցներով իրականացվել են ճանապարհաշինական, կրթական և առողջապահական խոշոր ծրագրեր, Հայաստանի տարբեր մարզերում վերանորոգվել են  դպրոցներ, հիվանդանոցներ, կամուրջներ և ճանապարհներ։

Հիմնադրամը դադարել է գործել 2011 թվականին՝ Քըրքորյանի մահվանից չորս տարի առաջ։

Հայաստանյան ընդդիմությունն ու փորձագետները հաճախ են ներքաղաքական քննարկման առարկա դարձրել հիմնադրամի միջոցներով իրականացված նախագծերում ենթադրյալ վատնումների, ծրագրերի անարդյունավետ կառավարման կամ ոչ թափանցիկ ծախսերի, պետական վերահսկողության բացակայության թեման։

Քննադատությունները հիմնականում ուղղված էին երկրորդ նախագահ Ռոբերտ Քոչարյանի իշխանությանը՝ հիմնադրամի կողմից ֆինանսավորված նախագծերում ենթադրաբար չարաշահումներ անելու համար։ 

Քըրքորյանը երբևէ հրապարակային չի արձագանքել 

«Փաստերի ստուգման հարթակի» մշտադիտարկումը ցույց տվեց, ոչ չնայած չարաշահումների մասին լայն տարածված պնդումներին, ինքը՝ Քըրքորյանը, երբևէ հրապարակային կերպով չի անդրադարձել դրանց. բաց աղբյուրներում չկան տեղեկություններ այն մասին, որ ամերիկահայ բարերարն այս կամ այն կերպ արտահայտված լինի Քոչարյանի իշխանությանն ուղղված վերոհիշյալ մեղադրանքների մասին։ 

Սրանից զատ, Լինսի հիմնադրամի միջոցների անարդյունավետ ու ոչ թափանցիկ կառավարման, չարաշահումների մասին ոչ հայաստանյան և ոչ էլ միջազգային մամուլում պատշաճ հետաքննություններ ևս չկան։  

Ավելի վաղ էլ՝ 2021-ին, Fip.am-ը ստուգել ու պարզել էր, որ Քըրքորյանին վերագրվող նամակը, որն ամերիկահայ բարերարն իբրև թե հասցեագրել էր Քոչարյանին, կեղծ է։

Այսպիսով, ԱԺ փոխնախագահ Հակոբ Արշակյանի պնդումը, թե Քըրքորյանը հրապարակայնորեն արտահայտվել է Քոչարյանի իշխանությանը վերագրվող չարաշահումների մասին, բաց աղբյուրները չեն հաստատում։ Չնայած ներդրված միլիոնավոր դոլարների չարաշահումների մասին լայն տարածված պնդումներին՝ դրանք հաստատող վկայություններ և հետաքննություններ ևս չկան։ 

Նանե Մանասյան