Վարչապետի հայտարարության հետքերով. արդյո՞ք տուրիզմը Հայաստանում ապրում է «լավագույն ժամանակները»

Օգոստոսի 22-ին ՀՀ վարչապետ Նիկոլ Փաշինյանն իր ֆեյսբուքյան էջում գրել է․ «Տուրիզմը Հայաստանում ապրում է իր լավագույն ժամանակները։ 2025 թվականի մայիս, հունիս և հուլիս ամիսներին Հայաստանի Հանրապետություն են այցելել այդ ամիսների համար պատմականորեն ռեկորդային թվով զբոսաշրջիկներ՝ մայիսին՝ 181․436, հունիսին՝ 215․253, հուլիսին՝ 263․592 այցելու»։

«Փաստերի ստուգման հարթակն» ուսումնասիրել է վերջին տարիների պաշտոնական վիճակագրությունը՝ թե՛ վարչապետի նշած երեք ամիսների, թե՛ հունվար-հուլիս ժամանակահատվածի կտրվածքով։

Մայիս-հուլիս ամիսների համեմատություն

Վիճակագրական տվյալների համաձայն՝ 2019-2025 թթ․ մայիս-հուլիս ամիսներին զբոսաշրջային մուտքերի ամենաբարձր ցուցանիշն, իսկապես, գրանցվել է հենց 2025 թվականին՝ 660․281 այցելու։ 

Համեմատության համար՝

• 2024 թվականին գրանցվել է շուրջ 585 հզր զբոսաշրջիկ,
• 2023 թվականին՝ 631 հզր,
• 2022 թվականին՝ 435 հզր,
• 2021 թվականին՝ 222 հզր,
• 2019 թվականին՝ 503 հզր։
  

Այսպիսով՝ վարչապետի պնդումն այս երեք ամիսների վերաբերյալ համապատասխանում է իրականությանը։

Հունվար-հուլիս ամիսների համեմատություն

Այդուհանդերձ, FIP.am-ը փորձել է պարզել՝ արդյոք Հայաստանում զբոսաշրջությունը «լավագույն ժամանակներն» է ապրում: Ուսումնասիրել ենք 7 տարիների հունվարից հուլիս ընկած ժամանակահատվածների զբոսաշրջիկների այցելությունների դինամիկան։ Արդյունքում՝ պատկերը բոլորովին այլ է։

• 2025 թվականի հունվար-հուլիսին Հայաստան է այցելել շուրջ 1 մլն 170 հզր զբոսաշրջիկ,
• 2024 թվականի հունվար-հուլիսին՝ 1 մլն 183 հզր,
• 2023 թվականի հունվար-հուլիսին՝ 1 մլն 260 հզր,
• 2022 թվականի հունվար-հուլիսին՝ 783 հզր,
• 2021 թվականի հունվար-հուլիսին՝  351 հզր,
• 2019 թվականի հունվար-հուլիսին՝ 973 հզր։

Ի դեպ, FIP.am-ն ուսումնասիրել է նաև վերջին տարիների տարեկան վիճակագրությունը և արձանագրել, որ 2019-2024 թթ․ ընթացքում զբոսաշրջիկների ամենաբարձր թիվը գրանցվել է 2023 թվականին՝ 2մլն 316 հզր մարդ։ 

Այսպիսով, եթե վարչապետի նշած մայիս-հուլիս ամիսների տվյալները   կարող են ներկայացվել որպես «լավագույն ժամանակներ»՝ կարճատև կտվածքով, ապա տարվա առաջին յոթ ամիսների համեմատությունը նման գնահատականի հիմք չի տալիս։ Այդ ցուցանիշներով ոլորտի «լավագույն ժամանակներ» դեռևս կարելի է համարել 2024 թվականը, երբ զբոսաշրջիկների թիվը ավելի քան 13 հազարով գերազանցել է 2025 թվականի նույն ժամանակահատվածի արդյունքը։

Գայանե Մարկոսյան