Հանրապետականի 2012թ․-ի չիրականացած խոստումները․ կրթության ոլորտ

Հայաստանի Հանրապետական կուսակցությունը 2012 թվականի իր նախընտրական քարոզարշավի ընթացքում բազմաթիվ խոստումներ է տվել, որոնցից սակայն ոչ բոլորն են իրագործվել:

Մասնավորապես վերջինս խոստացել է Հայաստանի յուրաքանչյուր առաջին դասարանի աշակերտին անվճար համակարգիչ տրամադրել: Այս խոստումն առկա է նաև Սերժ Սարգսյանի 2013 թվականի նախընտրական ծրագրում:

Այս առումով կրթության և գիտության նախարարությունից տեղեկացանք, որ 2012-2016թթ. Հայաստանում առաջին դասարան է ընդունվել 188,523 երեխա, իսկ մեկ այլ գրությամբ տեղեկացանք, որ այդ նույն ժամանակահատվածում տրամադրվել է  5,930 հատ համակարգիչ և 1,359 պլանշետ: Այլ կերպ ասած, վերջին 5 տարիների ընթացքում դպրոց ընդունված առաջին դասարանցիների միայն 3.8 տոկոսն է ստացել համակարգիչ:

Կրթությանը վերաբերող Սերժ Սարգսյանի տված մյուս չիրականացված խոստումը անվճար բարձրագույն կրթության ապահովումն է սոցիալապես անապահով բոլոր խավերի համար:

Այս խոստման չիրագործումը հաստատվեց ԿԳ նախարարությունից ստացված գրությամբ։ Գրության մեջ մասնավորապես նշված է, որ 2014 թվականին կառավարության թիվ 1126-Ն որոշմամբ՝ հնարավորություն է ընձեռվել պետության կողմից լրիվ կամ մասնակի փոխհատուցում տրամադրել անապահով ընտանիքների որոշ խմբերին։ Ավելին, համաձայն գրության 2013 և 2014 թվականներին բակալավրի կամ մագիստրատուրայի 1-ին կուրս ընդունված ոչ մի ուսանող որևէ աջակցություն չի ստացել։