Լևոն Տեր-Պետրոսյանը Բրյուսել չի մեկնում

«Իրավունք» կայքը մարտի 10-ին «Տեր-Պետրոսյանը Նիկոլ Փաշինյանի հետ մեկնե՞լ է Բրյուսել» վերնագրով հոդված էր հրապարակել, որում, հղում անելով իր աղբյուրներին, գրել էր, որ առաջին նախագահ Լևոն Տեր-Պետրոսյանն առաջիկայում պատրաստվում է մեկնել Բրյուսել։ Չնայած ըստ կայքի տեղեկությունների՝ նախագահի այցը որևէ կապ չունի Նիկոլ Փաշինյանի այցի հետ, սակայն հոդվածի հեղինակը, այնուամենայնիվ, Տեր-Պետրոսյանի սպասվելիք այցը կապել էր Փաշինյանի՝ Բրյուսելյան այցի հետ։

«Անխոս մտահոգիչ է, թե ինչ են ծրագրում Փաշինյանն ու Տեր-Պետրոսյանը»,- գրել էր հեղինակը։

Այնուհետև «Իրավունք» թերթն իր մարտի 11-ի համարի «Բամբասանք» խորագրում հրապարակեց նույն հոդվածը՝ նախապես նշելով, որ այս խորագրի ներքո հրապարակվածի համապատասխանությունն իրականությանը չի երաշխավորում։

Թերթի այս հրապարակումը տարածել են news.am, lurer.com, hayeli.am, shabat.am, pastinfo.am, yelaket.am և այլ լրատվականներ, սակայն որևէ կայք չի նշել, որ «Իրավունք» թերթը չի երաշխավորում այս հրապարակման բովանդակության համապատասխանությունն իրականությանը։

Լևոն Տեր-Պետրոսյանի մամուլի խոսնակ Արման Մուսինյանը «Փաստերի ստուգման հարթակի» հետ զրույցում հերքեց այս տեղեկությունը։ «Հերթական անհեթեթությունն է»,- պատասխանեց Մուսինյանը՝ հստակեցնելով, որ նախագահը չի պատրաստվում մեկնել Բրյուսել։

Այսպիսով, «Իրավունք» թերթի տեղեկությունները, իրոք, չեն համապատասխանում իրականությանը։

Սևադա Ղազարյան