Ինչ է սահմանում արտակարգ դրության ռեժիմը․ հիմնական դրույթները

Կառավարությունը մարտի 16-ի արտահերթ նիստում հրապարակեց ՀՀ-ում արտակարգ դրություն հաստատելու մասին նախագիծը։ Կառավարությունն առաջարկում է մարտի 16-ից մեկ ամսով՝ մինչև ապրիլի 14-ը, սահմանել արտակարգ դրություն ՀՀ ողջ տարածքում:

«Փաստերի ստուգման հարթակն» այդ նախագծից առանձնացրել է հիմնական դրույթները։ 

• ՀՀ պետական սահմանի բոլոր անցակետերում սահմանվում է տեղաշարժվելու հատուկ կարգ:

• Հայաստանի և այլ երկրների քաղաքացիները կարող են պետությունից դուրս գալ միայն օդային ճանապարհով (եթե ընդունող երկրի կողմից չեն գործում այլ սահմանափակումներ), վերադարձի դեպքում ՀՀ քաղաքացիները կենթարկվեն պարտադիր կարանտինի:

• ՀՀ համապատասխան համայնքի (համայնքների) վարչական սահմաններում ևս կարող են կիրառվել սահմանափակումներ։

• Քրեակատարողական հիմնարկներում, Պաշտպանության նախարարության զորամասերում արգելվում են  հանձնուքներ, ծանրոցներ և փաթեթներ ստանալը և ուղարկելը, տեսակցություններ ունենալը։

• Արգելվում են 20 և ավելի անձանց մասնակցությամբ հանրային միջոցառումներն այն համայնքներում, որտեղ պարետի որոշմամբ կիրառվում են սահմանափակումներ։

• Համապատասխան համայնքներում, պարետի որոշմամբ, արգելվում է հանրային սննդի օբյեկտների, առևտրի և զվարճանքի կենտրոնների գործունեությունը: 

• Ուսումնական հաստատությունները շարունակում են մնալ փակ։

• ԶԼՄ-ների համար սահմանվում են առանձին հրապարակումների, հաղորդումների արգելքներ. լրատվամիջոցները պարտավորվում են հաղորդել միայն պաշտոնական տեղեկատվություն։

• Ֆիզիկական և իրավաբանական անձանց գույքը, ներառյալ` դեղերը, բժշական պարագաները ու այլ միջոցները պարետի կողմից սահմանված դեպքերում կարող են օգտագործվել արտակարգ դրության ռեժիմի ապահովման համար

Կառավարությունն արտահերթ նիստը կշարունակի մարտի 16-ին՝ ժամը 17։15-ին։