Ժամկետից շուտ քաղաքական ցուցապաստառների փակցնելն օրենքի խախտում չէ

Վերջին օրերին ինչպես Երևանի, այնպես էլ այլ քաղաքների փողոցներում հայտնվել են քաղաքական տարբեր ուժերի գովազդային վահանակներ։ Սոցիալական ցանցերում, տեղադրելով այս վահանակների նկարները, հարց են ուղղում, թե արդյո՞ք քարոզարշավի պաշտոնական մեկնարկը չտրված՝ այս պաստառների հայտնվելն օրենքի խախտում չէ։ 

Անգամ լրագրողներն են «Իմ քայլի» պատգամավորներից պարզաբանում խնդրել այս հարցի շուրջ։ «ՔՊ-ն ունի, որը ապագայից է խոսում, «Լուսավոր Հայաստանն» ունի պաստառ, սրանք նախընտրական շրջանը չսկսած անհավասար պայմանների մասին չեն խոսու՞մ»,- հարցրել է լրագրողը «Իմ քայլը» խմբակցության պատգամավոր Վլադիմիր Վարդանյանին։ 

Նույն հարցադրումը լրագրողներն ուղղել են նաև «Իմ քայլը» խմբակցության ղեկավար Լիլիթ Մակունցին։

Մակունցը պնդել է, որ պաստառների տեղադրումը «գործող օրենքներին համապատասխան է և որևէ կերպ չի հակասում»։

Նշենք, որ հունիսի 20-ի խորհրդարանական արտահերթ (դեռևս չնշանակված) ընտրությունների պաշտոնական քարոզարշավը սկսվելու է հունիսի 7-ին՝ ընտրություններից 12 օր առաջ։ 

«Փաստերի ստուգման հարթակը» պարզեց՝ արդյո՞ք պաշտոնական քարոզարշավից շուտ քաղաքական ցուցապաստառների տեղադրումը օրենքի խախտում է, թե՞ ոչ։ 

Ժամկետից շուտ քաղաքական ցուցապաստառների փակցնելն օրենքի խախտում չէ

Սահմանադրության 42 հոդվածի առաջին կետով սահմանվում է՝ յուրաքանչյուր ոք ունի իր կարծիքն ազատ արտահայտելու իրավունք: Այս իրավունքը ներառում է սեփական կարծիք ունենալու, ինչպես նաև առանց պետական և տեղական ինքնակառավարման մարմինների միջամտության և անկախ պետական սահմաններից` տեղեկատվության որևէ միջոցով տեղեկություններ ու գաղափարներ փնտրելու, ստանալու և տարածելու ազատությունը:

Իսկ նույն հոդվածի 3-րդ կետով նշվում է՝ կարծիքի արտահայտման ազատությունը կարող է սահմանափակվել միայն օրենքով։

Որևէ օրենքով, այդ թվում՝ Ընտրական օրենսգրքով, արգելված չէ նախքան նախընտրական քարոզարշավի սկիզբը գովազդային պաստառների տարածումը, որը,  ըստ էության, գաղափարներ տարածելու ազատության իրացում է։

Ընտրական օրենսգիրքը կարգավորումներ է սահմանում բացառապես նախընտրական քարոզչության ժամանակահատվածի համար՝ արգելելով քարոզարշավ իրականացնել քվեարկության և դրա նախորդ օրը։  

ԿԸՀ-ի պարզաբանումը 

Կենտրոնական ընտրական հանձնաժողի մամուլի քարտուղար Հերմինե Հարությունյանը Fip.am-ի հետ զրույցում հաստատեց, որ այս փուլում, երբ նշանակված չեն ընտրություններ, նման պաստառների առկայությունը Ընտրական օրենսգրքի որևէ դրույթի խախտում չէ։

«Ընտրական օրենսգրքով հստակ սահմանված է նախընտրական քարոզչության ժամանակահատվածը, որի ընթացքում գործում են հանրային ռեսուրսներից օգտվելու, քարոզչություն իրականացնելու և ֆինանսական թափանցիկությունն ապահովելու կանոնները»,- ասաց նա։ 

Այսպիսով, պնդումը, թե պաշտոնական քարոզարշավից շուտ քաղաքական ցուցապաստառների տեղադրումը օրենքի խախտում է, սխալ է։ 

Նելլի Լազարյան