Պատգամավորը սխալվում է․ նախկինում ևս սպաները ծառայության ընթացքում բնակարան ստացել են

Կառավարությունն օրենսդրական փոփոխություն է նախաձեռնել, որով առաջարկվում է 2022 թվականի հուլիսի 1-ից հետո ռազմաուսումնական հաստատություն ընդունված և համապատասխան պայմանագիր կնքած զինծառայողներին անհատույց օգտագործման և անհատույց սեփականության իրավունքով բնակարան հատկացնել։

Հունիսի 14-ին Ազգային ժողովի ամբիոնից «Քաղաքացիական պայմանագիր» կուսակցության պատգամավոր Արմեն Խաչատրյանը, խոսելով «Զինվորական ծառայության և զինծառայողի կարգավիճակի մասին» օրենքում կատարվելիք այս փոփոխությունից, հայտարարեց, որ Հայաստանում ոչ մի սպա մինչև թոշակի անցնելը պետության կողմից երբևէ բնակարան չի ստացել։

«Բարեփոխումները բանակի կայացման ուղղությամբ շարունակվում են, բայց ամենակարևորներից մեկը ես համարում եմ սա (օրենքի նախագիծը — խմբ․), որ երբևէ նման բան չի եղել, որ սպային տրամադրեն բնակարան մինչև կենսաթոշակի անցնելը»,- հայտարարեց Արմեն Խաչատրյանը։

«Փաստերի ստուգման հարթակը» հարցում ուղարկեց Պաշտպանության նախարարություն՝ խնդրելով հայտնել, թե անկախությունից ի վեր մինչ օրս քանի՞ սպա է բնակարան ստացել։

Ի պատասխան մեր հարցման, նախարարությունից հայտնեցին, որ ըստ ՊՆ զինծառայողների սոցիալական պաշտպանության վարչությունում առկա էլեկտրոնային տվյալների՝ ՀՀ պաշտպանության նախարարության կողմից ծառայողական բնակելի ֆոնդի կառուցման, ինչպես նաև վերանորոգման արդյունքում՝ ՊՆ բնակարանային հաշվառման հերթացուցակում ընդգրկված թվով 1754 զինծառայողի նրանց ծառայության ընթացքում հատկացվել են ծառայողական բնակարաններ։ Բնակարանների գերակշիռ մասը անհատույց սեփականության իրավունքով տրամադրվել է շահառուներին։

Այսպիսով, ի հեճուկս պատգամավոր Խաչատրյանի պնդման, Հայաստանում նախկինում ևս զինծառայողներին ծառայության ընթացքում հատկացվել են բնակարաններ։ Ի դեպ, բնակարանների հատկացման վերաբերյալ մամուլում տեղ գտած հրապարակումները բազմաթիվ են, դրանց թվում են նաև նոր իշխանությունների օրոք հատկացված բնակարանների վերաբերյալ արված հրապարակումները։

Սպաներին բնակարանների տրամադրման վերաբերյալ հրապարակումներից մի քանիսին կարող եք ծանոթանալ հետևյալ հղումներով (հղում 1, հղում 2, հղում 3, հղում 4, հղում 5)։

Սևադա Ղազարյան