Մանուկյանը մասամբ ճիշտ է, մեծամասամբ՝ սխալ. Պարեկային ծառայության 290 մեքենաներից չի շահագործվում 67-ը

«Հայաստան» խմբակցության պատգամավոր Գեղամ Մանուկյանը հոկտեմբերի 13-ին 168 TV-ի Review հաղորդման ժամանակ անդրադառնալով Պարեկային ծառայության հաշվեկշռում եղած տրանսպորտային միջոցների վիճակին, տեսակետ է հայտնել, որ դրանց մեծ մասը խափանված է։ 

«Որքան տեղյակ եմ, ավտոպարկի մեծ մասն էլ խափանված կանգնած է»,- նշում է  պատգամավորը։ 

«Փաստերի ստուգման հարթակը» փորձեց պարզել Պարեկային ծառայության ավտոպարկում եղած մեքենաներից քանիսը  չի շահագործվում և ի՞նչ պատճառով։

Պարեկային ծառայության պետ, ոստիկանության գնդապետ Արթուր Ումրշատյանը մեր գրավոր հացմանն ի պատասխան հայտնել է, որ Պարեկային ծառայության հաշվեկշռում առկա է ընդհանուր 290 տրանսպորտային միջոցներ։

Մասնավորապես Երևան քաղաքի գնդում առկա է 150 ծառայողական ավտոմոբիլ, որոնցից 52-ը չի շահագործվում՝ 49 վթարված, 3-ը տեխնիական խնդրով։

Շիրակի մարզի գումարտակում առկա է 70 ծառայողական ավտոմեքենա, որոնցից 7-ը չի շահագործվում, 7-ն էլ վթարված լինելու պատճառով։

Լոռու մարզի գումարտակում առկա 70 մեքենաներից 8-ը չի շահագործվում, 8-ն էլ վթարված լինելու պատճառով։

Այսպիսով, Պարեկային ծառայության հաշվեկշռում առկա ընդհանուր 290 տրանսպորտային միջոցներից այս պահին չի շահագործվում 67-ը կամ 23,1%-ը: 

Թեև շարքից դուրս եկած ծառայողական մեքենաների թիվը բավական զգալի է, սակայն ավտոպարկում եղած մեքենաների մեծ մասը չէ, ինչպես պնդում է Գեղամ Մանուկյանը։

Նելլի Լազարյան