Հանրայինը Թևանյանին վերագրել է չասված խոսքեր․ «Հայաստան» խմբակցության պատգամավորը ճիշտ է

Փետրվարի 9-ին Ազգային ժողովում ելույթ ունենալիս «Հայաստան» խմբակցության պատգամավոր Անդրանիկ Թևանյանը հայտարարել է, որ Հանրային հեռուստաընկերությունն Ազգային ժողովի փետրվարի 8-ի նիստը լուսաբանելիս խեղաթյուրել է իր խոսքերը:

Պատգամավորի խոսքով՝ իշխանության ներկայացուցիչները շատ պարզունակ տեխնոլոգիա են կիրառում՝ «ընդդիմախոսներին վերագրում են խոսքեր, հետո կռիվ են տալիս ու ցույց են տալիս, թե իրենք որքան ճիշտ են, այսինքն՝ խեղաթյուրում են իրականությունը»:

«Այդ պրոցեսը ես երեկ տեսա Հ1-ով, երբ ռեպորտաժ է պատրաստվում այս թեմայի վերաբերյալ, և հանրային փողերից սնվող կառույցը, մասնավորապես, իմ խոսքը չի տալիս, բայց իմ անունից սուտ հայտարարություն է անում, հետո երկար ուղիղ խոսքով կամ սինխրոնով տալիս է, թե ինչ պատասխանեց իշխանության ներկայացուցիչը իմ այդ պնդմանը, որը ես չէի արել»,- նշել է Թևանյանը: 

«Փաստերի ստուգման հարթակն» ուսումնասիրեց Հանրային հեռուստատեսության փետրվարի 8-ի լուրերի գլխավոր թողարկումը և պարզեց, որ Թևանյանը ճիշտ է: 

«Արտաքին քաղաքական օրակարգը՝ ըստ Խանդանյանի» ռեպորտաժի ընթացքում լրագրողը նշում է. «Ելույթի ընթացքում «Հայաստան» խմբակցության պատգամավոր Անդրանիկ Թևանյանը քննադատել է իշխանությանը Թուրքիա մարդասիրական օգնություն ուղարկելու համար»:

Թեև այդ բովանդակությամբ Թևանյանի խոսքի մեջբերումը չի հեռարձակվում, հնչում է ԱԺ նախագահի տեղակալ Ռուբեն Ռուբինյանի պատասխանը, ըստ որի՝ նախկին նախագահները տարբեր առիթներով օգնություն առաջարկել են Թուրքիային: 

Իրականում, Անդրանիկ Թևանյանն իր ելույթում չի քննադատել Թուրքիա ուղարկված մարդասիրական օգնությունը: Անդրադառնալով Թուրքիայում և Սիրիայում տեղի ունեցած երկրաշարժին և իշխանությունների արձագանքին՝ պատգամավորը նշել է, որ եթե հանրության մեջ Սիրիայի մասով հարցեր չեն առաջացել, ապա Թուրքիայի մասով առաջացել են: Ըստ նրա՝ մի մասը գտնում է, որ շատ ճիշտ է արել, որ ցավակցել է և օգնություն առաջարկել, իսկ մյուս մասը ճիշտ հակառակ տեսակետին է, քանի որ Թուրքիան ունի համապատասխան վարքագիծ:

«Ես չեմ ուզում այդ քննարկումների դաշտ մտնել, այլ ուզում եմ բացել այն փակագծերը, որ կան երրորդ տեսակետը հայտնողների մոտ: Այո, կարելի էր ցավակցել Թուրքիային և որոշակի աջակցություն առաջարկել, բայց…: Այդ բայցի տակ տարբեր մարդիկ տարբեր տեսակետներ են ներկայացնում»,- ասել է Թևանյանը: 

Նրա խոսքով՝ հարցերից մեկն այն է, թե ինչու Իրանում վերջերս տեղի ունեցած երկրաշարժի ժամանակ Հայաստանի իշխանությունները համանման արձագանք չունեցան։

«Այլ պայմաններում սա հասկանալի կլիներ, այս դեպքում կարող է հասկանալի լինել, որովհետև նախադեպեր եղել են, որ ՀՀ նախագահը մասնակցել է Թուրքիայի առաջին դեմքի հուղարկավորությանը: Ունեցել են դեպքեր, երբ ցավակցություն է հայտնվել Թուրքիային: Դա ընդունված պրակտիկա է: Էստեղ խնդիր չկա, բայց հետաքրքիր է, որ արձագանք, որը օպերատիվ տրվում է Թուրքիային, չի տրվել Իրանին»,- ասել է Թևանյանը՝ հավելելով, որ Թուրքիայի հետ կապված այլ իրադարձությունների արձագանք չի տրվում:

Այսպիսով, Հանրային հեռուստաընկերությունն իսկապես խեղաթյուրել է Անդրանիկ Թևանյանի ելույթը: Նա դեմ չի արտահայտվել Թուրքիա մարդասիրական օգնություն ուղարկելուն, այլ մի քանի հարց է բարձրացրել այդ թեմայի հետ կապված: Ավելին՝ ռեպորտաժում ի պատասխան Թևանյանի հնչում են Ռուբինյանի խոսքերը նախորդ իշխանությունների օրոք Թուրքիային ցավակցելու նախադեպերի մասին, որոնց իր ելույթում ընդդիմադիր պատգամավորն արդեն իսկ անդրադարձել էր։ 

Լուսինե Ոսկանյան