Սեքսը Շվեդիայում սպորտաձև չի ճանաչվել․ չստացված առաջնությունը՝ միջազգային և տեղական մամուլում

Հունիս ամսվա սկզբին միջազգային տաբլոիդների թոփ թեմաներից էր այն տեղեկությունը, որ պատմության մեջ առաջին անգամ սեքսի առաջնություն կանցկացվի Շվեդիայում։ Սեքսի առաջին Եվրոպայի առաջնության անցկացման մասին լուրերի սկզբնաղբյուրը Հնդկաստանի Times of India կայքն էր, որը գրել էր, թե Շվեդիան պաշտոնապես գրանցել է սեքսը որպես սպորտաձև։ 

Սեքս-մրցաշարն ըստ այդ լուրի՝ պետք է կայանար համապատասխանաբար Գյոթեբորգում, տևեր մի քանի շաբաթ, իսկ բացումը նախատեսված էր հունիսի 8-ին։ 

Շուտով տարբեր երկրների մի շարք լրատվամիջոցներ,  հղում անելով Շվեդիայի սեքսի ֆեդերացիայի կայքին, գրեցին շվեդական սեքսի առաջնության մասին։ Այդ թվում նաև  ռուսալեզու և հայկական մամուլում ու սոցցանցերում թեման բուռն քննարկման և մեմերի առիթ դարձավ։  

Կարճ ժամանակ անց տեղեկացվեց, որ սեքսի առաջնությունը չեղարկվել է, իսկ պատճառը կազմակերպիչների ձախողումն է։

Թեման դեռևս շարունակեց ակտուալ մնալ հատկապես հայկական կայքերում, որոնք  հուլիսի 7-ին հղում անելով Daily Star կայքին գրեցին, թե հայտնի է ով է Շվեդիայի սեքսի առաջնության հաղթողը։ Լուրը նաև տարածել էր ռուսական lenta.ru-ն։ 

Շվեդիան պաշտոնապես սեքսը սպորտ չի ճանաչել

Գերմանական հանրային հեռարձակող «Դոլչե Վելե»-ն պարզել էր, որ Շվեդիան պաշտոնապես սեքսը սպորտ չի հայտարարել։ 

«Այս ամբողջ տեղեկատվությունը կեղծ է», — DW-ին Ստոկհոլմից գրավոր պատասխանել էր Շվեդիայի սպորտի կոնֆեդերացիայի խոսնակ Աննա Սեցմանը։ 

Ըստ  կայքի՝ հունվարին շվեդական Göteborgs-Posten թերթը հոդված է հրապարակել ոմն Դրագան Բրատիչի մասին, որը մի քանի սթրիփ-ակումբների սեփականատեր է և ցանկացել է, որ սեքսը դասակարգվի որպես սպորտ։ Նա հիմնել է Շվեդիայի սեքսուալ ֆեդերացիան (SSF) և դիմել Շվեդիայի սպորտային կոնֆեդերացիայի կազմում ընդգրկվելու համար։ Շվեդիայի սպորտային կոնֆեդերացիան DW-ին հաստատել է, որ Դրագան Բրատիչ անունով անձը, որը պնդում էր, որ գոյություն ունի սեքսի ֆեդերացիա, դիմել էր անդամակցության համար, սակայն մայիսին դիմումը մերժվել է:

«Չկա սեքսի ֆեդերացիա, որը Շվեդիայի սպորտային կոնֆեդերացիայի անդամ է»,- ասել էր Սեցմանը։

Սեքսի ձախողված առաջնությունը 

Չնայած «Եվրոպայի առաջին սեքսի առաջնության» շուրջ սկանդալին, կազմակերպիչները հայտարարել են դրա մեկնարկի մասին։ Թեև տեղեկությունն այլևս մեդիայում նախկին տարածումը չի գտել, այդուհանդերձ որոշ կայքեր գրել են, որ միջոցառմանը մոտ մեկ տասնյակ ազգերի ներկայացուցիչներ կմասնակցեն։ Հայտարարվել է, որ ուղիղ եթերով կհեռարձակվի առաջնությունը։ Մասնակիցներից մեկը, սակայն, տեղեկացրել է, որ առաջնությունն ավարտվել է դեռ չսկսած, մրցույթի մեկնարկը մեկ օրով հետաձգվել է, ապա հաջորդ օրն էլ չի սկսել։ 

Միայն Daily Star «դեղին» կայքն է գրել, որ մրցույթը կայացել է և  սեքսի առաջնությունում հաղթել է խորվաթուհի մասնակիցը, որը թվիթերի իր միկրոբլոգում գավաթով լուսանկար է հրապարակել։  

Այսպիսով պարզ է դարձել, որ տեղեկությունը, թե  Շվեդիան պաշտոնապես գրանցել է սեքսը որպես սպորտաձև, կեղծ է, իսկ առաջին անգամ սեքսի առաջնություն անցկացնելու փորձ այդուհանդերձ եղել է։ 

Նելլի Լազարյան