Հերքված լուրեր՝ Մուրացանի բժիշկների, ՔՊ պատգամավորի ստատուսի ու ԵՊՀ-ի պրոռեկտորի մասին

«Փաստերի ստուգման հարթակը» ներկայացնում է մայիսի 11-14-ն ընկած ժամանակահատվածում մամուլում հայտնված կեղծ և հերքված տեղեկությունները։

Մայիսի 11-ին Oragir.News կայքը գրեց, թե իր տեղեկություններով՝ Մուրացանի զինվորական հոսպիտալի բժիշկների անձնագրերը վերցրել են, ինչպես նաև աշխատակիցներին ստիպել են «ստորագրել առ այն, որ նրանք չեն մասնակցելու բողոքի ցույցերին»։

«Աշխատակիցներին նաև սպառնացել են, որ ովքեր մասնակցեն բողոքի ակցիաներին աշխատանքից կհեռացվեն»,- գրել է կայքը։ 

ՊՆ-ն, սակայն, հերքել է այդ լուրերը ու կոչ արել զերծ մնալ զինծառայողներին քաղաքական ակցիաներին ներգրավվելու ցանկացած փորձից։

Մայիսի 13-ին փաստաբան, Արցախի նախկին ՄԻՊ Ռուբեն Մելիքյանը ֆեյսբուքյան իր էջում «սքրինշոթ» էր հրապարակել, իբր, «Քաղաքացիական պայմանագիր» խմբակցության ԱԺ պատգամավոր Հասմիկ Հակոբյանի գրառումից ու գրել . «Հանրային լայն հաշտության օրակարգին ՔՊ-ական այս դեպուտատը պատասխանում է անհանդուրժողականություն հրահրելով։ Լավ չի, աղջի՛կ ջան, հեչ լավ չի։ Ոչ երանի քեզ հետ սուրճ խմողին․ դժվար թե հաջողվի քեզ բան բացատրել»։

Հասմիկ Հակոբյանը, սակայն, հանդես էր եկել հերքմամբ․ անհնազանդության խաղաղ ակցիա իրականացնող ցուցարարներին վիրավորող գրառման հեղինակը ինքը չէ՝ ֆեյք է։

«Սլովակիայում եմ գտնվում, մեկ ժամ առաջ ավարտեցինք շատ կարևոր հանդիպում: Սա, վստահ եմ՝ ոչ մի սադրիչի ու բանսարկուի հետաքրքիր չէ»,- գրել էր պատգամավորը:

Ավելի ուշ Ռուբեն Մելիքյանն ընդունեց, որ լուսանկարը կեղծ է, և շեշտեց, որ ինքը դրա կեղծ լինելու մասին չի իմացել։ 

Մայիսի 13-ին 168.am-ը, հղումով իր աղբյուրներին, գրել էր, թե Երևանի պետական համալսարանի ուսումնական գծով պրոռեկտոր Էլինա Ասրիյանը ժողով է հրավիրել բուհի դեկանների հետ և հանձնարարել նրանց անպայման նշել բոլոր ուսանողների բացակաները։ Նա ասել է, որ բոլոր այն ուսանողներին, որոնք շատ բացականեր ունեն, պետք է նկատողություն հայտարարել, և հավելել, որ պետք է ամեն գնով դադարեցնել ուսանողների դասադուլը։ «Պետք լինի՝ 1000 ուսանող էլ կհեռացնեմ համալսարանից»,- մասնավորապես, 168․am-ի փոխանցմամբ, հայտարարել է Էլինա Ասրիյանը։ 

Նույն տեղեկությունը հնչեցրել է նաև «Տավուշը հանուն հայրենիքի» շարժման առաջնորդ Բագրատ Սրբազանը՝ Երևանի Սուրբ Աննա եկեղեցու բակում հավաքի ժամանակ։ 

ԵՊՀ ուսումնական գծով պրոռեկտոր Էլինա Ասրիյանը, սակայն, մայիսի 14-ին հանդիպել է համալսարանի դիմաց Բագրատ Սրբազանի գլխավորությամբ ակցիա իրականացնողների հետ ու հերքել տարածվող տեղեկությունը, թե, իբր ուսանողներին կհեռացնեն բուհից դասադուլին միանալու համար։ 

«Երեկ որևէ հանդիպում որևէ դեկանի հետ տեղի չի ունեցել, այստեղ դեկաններ կան, որոնք կարող են դա հաստատել, հետևապես, որևէ նման հայտարարություն չի կարող լինել»,- ասել է Ասրիյանը՝ հավելելով, որ ԵՊՀ-ն ուսանողակենտրոն կառույց է ու այնտեղ յուրաքանչյուր ուսանողի իրավունքը պաշտպանված է։

Սյուզաննա Համբարձումյան