ՆԳՆ-ն անտեսում է կառավարության որոշումները

Այս տարվա մայիսի 23-ին կառավարության 04․05․2017 թ․ 526-Ն որոշման մեջ փոփոխություններ կատարվեցին, որոնցով պարզեցվեցին ՀԿ-ների ու ԶԼՄ-ների համար պետական գնումների վերահսկողության մեխանիզմները։ 

Եթե նախկինում յուրաքանչյուր գնման հանձնման-ընդունմանը ներկա գտնվելու համար անհրաժեշտ էր պայմանագիրը կնքելու մասին հայտարարության հրապարակումից հետո 3 օրվա ընթացքում պատվիրատուին ներկայացնել մի շարք փաստաթղթեր, այժմ արդեն, նոր կարգավորումներով, ընդամենը անհրաժեշտ է այդ փաստաթղթերի ցանկը մեկ անգամ ներկայացնել Ֆինանսների նախարարություն, ստանալ համապատասխան վկայական և ցանկացած ժամանակ մասնակցել գնումների հանձնման-ընդունմանը։ 

Այսինքն, կառավարության որոշմամբ հանվեցին ժամկետի սահմանափակումները և յուրաքանչյուր անգամ այդ փաստաթղթերը ներկայացնելու պարտադիր պահանջը։

Որոշման արդյունքում Ֆինանսների նախարարությունում հավատարմագրված կազմակերպությունները կարող են ցանկացած ժամանակ այցելել նաև ընթացքի մեջ գտնվող շինարարական օբյեկտներ, կատարել տեսա և լուսանկարահանում՝ նաև այդ կերպ վերահսկելով գնումների գործընթացը։

Կառավարության նիստում, որի ժամանակ քննարկվում էր այս փոփոխության հարցը, վարչապետ Նիկոլ Փաշինյանը, խոսելով շինարարության վերահսկողության մասին, ասաց․ «Սա կարող է առիթը լինել, որ շինհրապարակների կուլտուրան որոշակիորեն բարելավվի։ Հույս ունենք, որ հանրային սեկտորը ավելի ակտիվ կլինի այս իրավիճակներում, և սա մի որոշում է, որը շարունակաբար ի ցույց է դնում թափանցիկության սկզբունքի նկատմամբ կառավարության վերաբերմունքը»։

Այս փոփոխությունից հետո փորձեցինք այցելել Խորենացի 158 հասցեում ՆԳՆ ոստիկանության կողմից պատվիրված շինարարության վայր, որտեղ նախկին ՊՊԾ գնդում կառուցվում է Պարեկային ծառայության նոր տեղակայման վայրը։ 

Կապալառու կազմակերպությունը «Բիդեք» ՍՊԸ-ն է, որը շինաշխատանքների մրցույթում հաղթող է ճանաչվել ավելի քան 1․8 մլրդ դրամ գնառաջարկով։

Շինհրապարակ այցելելու նպատակով հունիսի 28-ին գրություն ուղարկեցինք ՆԳՆ ոստիկանություն՝ խնդրելով օրենքով սահմանված 2 աշխատանքային օրում կազմակերպել մեր այցը Խորենացի 158 հասցե։

Ու չնայած կառավարության որոշմամբ հայտ-պահանջը ստանալուց հետո 2 աշխատանքային օրվա ընթացքում ոստիկանությունը պարտավոր էր կազմակերպել մեր այցը շինհրապարակ, սակայն անտեսելով այս պահանջը, միայն հուլիսի 11-ին՝ մեր պահանջից 2 շաբաթ անց, ՆԳՆ-ից ստացանք գրություն, որով, փաստացի, հրաժարվեցին պահանջը կատարելուց։

«Հաշվի առնելով Ձեր կողմից նշված շինարարական տարածքում ընթացող ինտենսիվ աշխատանքները, ՀՀ ներքին գործերի նախարարության պատասխանատու ստորաբաժանման ծանրաբեռնվածությունը՝ ներկայումս հնարավոր չէ կազմակերպել Ձեր այցը նշված տարածք։ Նման հնարավորության առկայության դեպքում Ձեզ լրացուցիչ կտեղեկացվի»,- ասված էր մեզ ուղարկված պատասխանում։

Այսպիսով փաստենք, որ ի հեճուկս կառավարության որոշմամբ սահմանված պահանջի և վարչապետ Նիկոլ Փաշինյանի այն հայտարարության, որ կառավարության որոշման այս փոփոխությունը ևս մեկ անգամ ապացուցում է թափանցիկության սկզբունքի նկատմամբ կառավարության վերաբերմունքը, Ներքին գործերի նախարարությունը ապացուցում է հակառակը՝ կոպտորեն խախտելով կառավարության որոշմամբ իր վրա դրված պարտավորությունը և խոչընդոտելով դիտորդների այցը շինհրապարակ։

Սևադա Ղազարյան