Նիկոլ Փաշինյանը չի դադարեցրել արագաչափերի գործունեությունը. ԶԼՄ-ները ոչ ճիշտ վերնագրեր են ընտրել

Կառավարության մայիսի 17-ի նիստում վարչապետ Նիկոլ Փաշինյանը, դիմելով արդարադատության նախարար Արտակ Զեյնալյանին և ոստիկանապետ Վալերի Օսիպյանին, անդրադարձավ արագաչափ սարքերով և տեսախցիկներով ճանապարհատրանսպորտային երթևեկության կանոնների խախտումներ արձանագրելու խնդրին:

Նիկոլ Փաշինյանն իր խոսքում բառացիորեն ասաց. «Նախ ես կարծում եմ, որ այնտեղ հսկայական տուգանքներ կան կուտակված, տույժ-տուգանքներով, որոնք մարդիկ չեն վճարել. ենթադրվում է դրա հնարավորությունը չունենալու պատճառով, և մենք պետք է մեխանիզմներ մտածենք այդ պարտքը ներելու մասին: Եվ երկրորդը՝ պետք է մտածել արագաչափերի և տեսախցիկների գործունեության հետագա արդյունավետության մասին: Կարծում եմ նպատակահարմար կլինի ինչ-որ մի ժամանակաշրջանով, եթե կա այդպիսի օրենսդրական հնարավորություն, եթե չկա, մտածել այդ օրենսդրական հնարավորության մասին, դրանց գործունեությունը դադարեցնելու կամ կասեցնելու մասին կամ առնվազն պետք է մենք այդ պրակտիկան շատ արագ՝ հենց այսօրվանից, դադարեցնենք: Երբ որ հոծ գծեր շոշափելու համար մարդկանց տուգանում են, այսինքն՝ ես դա նախկինում էլ ասել եմ, պարոն Օսիպյան, որ մարդկանց անընդհատ տուգանելու մոլուցքի քաղաքականությունը պետք է շատ արագ կանգնեցնել: Մենք պետք է փոխենք ընդհանրապես մեր վերաբերմունքն այդ հարցի կապակցությամբ»

Դրանից հետո դիմելով Արդարադատության նախարար Արտակ Զեյնալյանին՝ վարչապետը խնդրեց հնարավորինս արագ ոստիկանության հետ համատեղ կոնկրետ առաջարկ ներկայացնել, և պայամնավորվեցին երկուշաբթի ոստիկանապետի և արդարադատության նախարարի հետ քննարկում ունենալ:

Վարչապետի հնչեցրած մտահոգությունը և առաջարկը ԶԼՄ-ներում բոլորովին այլ տրամաբանությամբ ներկայացվեց ու ստացվեց, թե իբր հանձնարարվել է կասեցնել արագաչափերի և տեսանկարահանող սարքերի գործունեությունը:

«Tert.am» կայքը հնչած առաջարկի վերաբերյալ իր գլխավոր լուրը վերնագրեց այսպես. «Վարչապետը հանձնարարեց ժամանակավոր կասեցնել արագաչափերի ու տեսախցիկների գործունեությունը», «Aysor.am» կայքը գրեց. «Պետք է ինչ-որ մի ժամանակաշրջանում կասեցնել արագաչափերի ու տեսախցիկների գործունեությունը. Նիկոլ Փաշինյան», «News.am»-ը վերնագրեց հետևյալ կերպ. «Պետք է ինչ-որ մի ժամանակ կասեցնել արագաչափերի ու տեսախցիկների գործունեությունը. Փաշինյան», «1in.am»-ն էլ ներկայացրեց որպես գրեթե ավարտված գործողություն. «Նիկոլ Փաշինյանը ժամանակավորապես դադարեցնում է արագաչափերի և տեսախցիկների գործունեությունը»: Հանրային հեռուստաընկերության պաշտոնական կայքի ֆեյսբուքյան էջում այս վերնագրով նյութը նույնիսկ գովազդվում է.«Արագաչափերի և տեսախցիկների գործունեությունը կդադարեցվի»:

Միտումնավոր են լրատվականները ոչ ճիշտ ձևով վերնագրել իրենց հրապարակումները՝ կդժվարանանք ասել, բայց փաստ է, որ այդ հրապարակումներից հետո մասնավորապես ֆեյսբուք սոցիալական ցանցում, Նիոլ Փաշինյանի առաջարկ մտահոգությունների դեմ արդեն քննադատություններ են հնչում: