Նորք-Մարաշի նոր ճանապարհը դեռ չի հանձնվել շահագործման, բայց օգտագործվում է․ Երևանի քաղաքապետը ճիշտ չի ասել

Երևանի Նորք-Մարաշ վարչական շրջանը Կենտրոնին միացնող նորակառույց ճանապարհը շահագործման հանձնելու մասին տեղեկությունները չեն հաստատվում, թեպետ քաղաքապետ Տիգրան Ավինյանը հայտարարել էր, որ ճանապարհը շահագործման է հանձնվել։   

Այսպես, Երևանի քաղաքապետ Տիգրան Ավինյանը հունվարի 17-ին ֆեյսբուքյան իր էջում տեսանյութ էր հրապարակել ու նշել, որ Նորք-Մարաշ վարչական շրջանը Կենտրոնին կապող Արմենակյան փողոցի բեռնաթափման համար կառուցված ճանապարհը շահագործման է հանձնվել:  

«Սա նոր հնարավորություն է ապահովում ավելի հեշտ ու արագ երթևեկելու համար՝ նվազեցնելով ծանրաբեռնվածությունը և բարձրացնելով մեր քաղաքի շարժունակությունը»,- տեսանյութին կից գրել էր Ավինյանը:

«Փաստերի ստուգման հարթակը» հարցմամբ փորձել էր քաղաքապետարանից պարզել, թե երբ է շահագործման հանձնվել Նորք-Մարաշ վարչական շրջանը Կենտրոնին միացնող նորակառույց ճանապարհը, երբ է տեղի ունեցել աշխատանքների հանձնման-ընդունման գործընթացը և ով է եղել կապալառու ընկերությունը:  

Փետրվարի 21-ին Երևանի քաղաքապետարանից ստացված գրավոր պատասխանի համաձայն, աշխատանքները դեռևս ամբողջությամբ ավարտված չեն, ճանապարհը հանձնված չէ շահագործման: Միաժամանակ, նաև տեղեկացրել են, որ կառուցման աշխատանքներ իրականացնող ընկերությունը «Արհովշին» ՍՊԸ-ն է: 

Նշենք, որ Երևանի քաղաքապետ Տիգրան Ավինյանը դեռևս 2023 թ․ հունվարի 13-ին հայտարարել էր, որ Նորք-Մարաշը Կենտրոնին կապող այլընտրանքային ճանապարհի շինարարական աշխատանքները կսկսվեն այդ տարվա ապրիլին, և հունիսից մարաշցիները կօգտվեն այդքան անհրաժեշտ ճանապարհից: 

Սակայն Նորք-Մարաշ վարչական շրջանը Սարալանջին կապող այլընտրանքային ճանապարհի շինարարական աշխատանքների համար հայտարարված առաջին մրցույթը չէր կայացել։ Այդ մասին 2023-ի մայիսի 8-ին Երևանի քաղաքապետարանի գործակարգավարական նիստին հայտարարել էր Երևանի քաղաքապետարանի աշխատակազմի շինարարության և բարեկարգման վարչության պետի պաշտոնակատար Խորեն Գրիգորյանը (2023 թ․ դեկտեմբերին ազատվել է պաշտոնից–խմբ․)՝ հավելելով, որ նոր հայտ են ներկայացրել մայիսի 4-ին։ Պատասխանելով Ավինյանի հարցերին՝ նա խոստացել էր, որ մինչև 2023 թվականի վերջ «շինարարությունը կհասցնեն»։  

Արդեն 2023 թ․ օգոստոսի 21-ին Երևանի քաղաքապետարանի աշխատակազմի շինարարության և բարեկարգման վարչության պետի պաշտոնակատար Խորեն Գրիգորյանը իր «Ֆեյսբուքի» էջով տեղեկացրել էր, որ մեկնարկել են Նորք-Մարաշ վարչական շրջանը Կենտրոն վարչական շրջանին կապող Արմենակյան փողոցին շրջանցիկ Գ.Հովսեփյան փողոցից դեպի Սարալանջի փողոց կապող ճանապարհի հիմնանորոգման աշխատանքները: Իսկ 2024 թ․ սեպտեմբերի 19-ին Երևանի քաղաքապետ Տիգրան Ավինյանը անձամբ էր այցելել և տեղում հետևել ճանապարհի կառուցման ընթացքին: 

Նորք-Մարաշ վարչական շրջանը Կենտրոնին կապող այլընտրանքային ճանապարհի շինարարական աշխատանքների համար հայտարարված մրցույթի գնահատող հանձնաժողովի առաջին արձանագրության համաձայն, գնման ընթացակարգին հայտ էր ներկայացրել միայն «Արհովշին» ՍՊԸ-ն և ներկայացվել էր 567 մլն 300 հազար  դրամ գնային առաջարկ:

Գնահատման հանձնաժողովի բացման և գնահատման նիստի ընթացքում իրականացված գնահատման արդյունքում «Արհովշին» ՍՊ ընկերության հայտում արձանագրվել էին անհամապատասխանություններ՝ հրավերի պահանջների նկատմամբ, մասնավորապես՝ ընկերության կողմից ներկայացված ծավալաթերթում առկա էին թվաբանական անճշտություններ: 

Գնահատող հանձնաժողովը կառավարության N526-Ն որոշման 41-րդ կետի հիման վրա առաջարկել էր շտկել արձանագրված անհամապատասխանությունները: Նկատենք՝ ըստ այդ որոշման, եթե հայտերի բացման նիստի ընթացքում իրականացված գնահատման արդյունքում մասնակցի հայտում արձանագրվում են անհամապատասխանություններ, ապա հանձնաժողովը մեկ աշխատանքային օրով կասեցնում է նիստը, իսկ հանձնաժողովի քարտուղարը նույն օրը դրա մասին էլեկտրոնային եղանակով տեղեկացնում է մասնակցին՝ առաջարկելով մինչև կասեցման ժամկետի ավարտը շտկել անհամապատասխանությունները: «Արհովշին» ընկերությունը սահմանված ժամկետում շտկել էր անհամապատասխանությունները և գնահատող հանձնաժողովը հայտը բավարարել էր: 

Երևանի քաղաքապետարանի և «Արհովշին» ՍՊԸ-ի միջև պայմանագիրը կնքվել էր 2023 թ․ օգոստոսի 5-ին և ըստ պայմանագրի, որպես կատարման վերջնաժամկետ նշվել էր 120-րդ օրացուցային օրը, ինչը նշանակում է, որ պայմանագրով նախատեսված վերջնաժամկետը չի պահպանվել։ 

Այսպիսով, Նորք-Մարաշ վարչական շրջանը Կենտրոնին կապող այլընտրանքային ճանապարհը, որը քաղաքային իշխանությունները ծրագրում էին կառուցել մինչև 2023 թ․ ավարտը, դեռ պաշտոնապես չի հանձնվել շահագործման, թեև արդեն օգտագործվում է վարորդների կողմից:

Երևանի քաղաքապետն այս հայտարարությունն արել  է տրանսպորտային խնդրի շուրջ քաղաքացիների դժգոհությունների ֆոնին՝ հավանաբար շտապելով դրական կարծիք ձևավորել իր ղեկավարած կառույցի գործունեության մասին։   

Սյուզաննա Համբարձումյան