Միրզոյան-Ռուբիո հանդիպումը պլանավորվել է Իրանում ցույցերից շաբաթներ առաջ․ կեղծիք ու մանիպուլյացիա TV5-ի եթերում

5-րդ ալիքի «Հայլուր» լրատվական ծրագրի հունվարի 14-ի թողարկման ընթացքում մեկնաբանը մտացածին մի մտահոգություն է վերագրել ՀՀ-ում Իրանի դեսպան Խալիլ Շիրղոլամին, որը դեսպանն իբրև թե արտահայտել է նույն օրը հայաստանյան ԶԼՄ-ների հետ իր ասուլիսի ընթացքում։ 

Մեկնաբանը, մասնավորապես, պնդել է, թե ՀՀ-ում Իրանի դեսպանին մտագոհել է, թե ինչու է Հայաստանը հունվարի 14-ին ԱՄՆ-ի հետ «Թրամփի ուղու» վերաբերյալ նոր փաստաթուղթ ստորագրել Վաշինգտոնում, այն դեպքում, երբ այս օրերին ամերիկյան մայրաքաղաքից սպառնալիքներ են հնչում Իրանի հասցեին։ 

Հիշեցնենք, որ հունվարի 14-ին ՀՀ արտաքին գործերի նախարար Արարատ Միրզոյանն ու ԱՄՆ պետքարտուղար Մարկո Ռուբիոն ստորագրել են «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) իրականացման շրջանակը։

Ի՞նչ մտահոգություններ է հայտնել Իրանի դեսպանը

Հունվարի 14-ին կայացել է ՀՀ-ում Իրանի դեսպանի ասուլիսը՝ իր երկրում ներքաղաքական զարգացումների ու բողոքի ցույցերի վերաբերյալ։ Այդ ընթացքում դեսպանը Հայաստանին վերաբերող երկու մտահոգություն է հայտնել։ 

Նա, մասնավորապես, դժգոհել է Երևանում ԻԻՀ դեսպանատան առջև իրանցիների բողոքի ակցիայի կապակցությամբ՝ նշելով, որ «Թեհրանում ձևավորվում է մի պատկերացում, որ Հայաստանը դառնում է Իրանի դեմ թշնամաբար տրամադրված ուժերի համար կենտրոն»։ 

«Այդ ակցիաների մասնակիցները բողոքում էին Իրանում ցուցարարների սպանություններից, կրոնական իշխանության փոխարեն աշխարհիկ իշխանություն պահանջում», — ասել էր դեսպանը։

Ասուլիսի ընթացքում դեսպանը անդրադարձել է նաև «Թրամփի ուղու» շուրջ վերջին զարգացումներին՝ բառացիորեն նշելով հետևյալը․ «Ինչ վերաբերում է Հայաստանի և ԱՄՆ-ի միջև պայմանավորվածություններին, մեր դիրքորոշումը հստակ է. մենք մեր հայ գործընկերներին հայտնել ենք, որ վստահում ենք ձեզ, սակայն մենք գործ ունենք ԱՄՆ-ի հետ, որը գործողություններ է ձեռնարկել Իրանի դեմ։ Մենք չենք վստահում ԱՄՆ-ին։ Մենք մտահոգված ենք, որ ԱՄՆ-ը կարող է օգտագործել այս նախագիծը իր անվտանգային քաղաքականության շրջանակներում։ Մենք դա փոխանցել ենք մեր հայ գործընկերներին։ Վերջիններս հավաստիացրել են, որ Հայաստանը երբեք սպառնալիքի աղբյուր չի դառնա Իրանի համար։ Մենք պայմանավորվել ենք, որ այս նախագծի մասշտաբները հասկանալու համար մեր քննարկումները պարբերաբար կշարունակվեն»։ 

Այսպիսով, 5-րդ ալիքի մեկնաբանը պաշտոնական Թեհրանին, և մասնավորապես դեսպանին է վերագրել նրա կողմից չհնչեցված մտացածին մտահոգություններ։ 

Մանիպուլյատիվ պնդում՝ ՀՅԴ-ական պատգամավորի կողմից 

ՀՅԴ-ական պատգամավոր Արթուր Խաչատրյանը լրագրողների հետ զրույցում մանիպուլյատիվ հարցադրում է արել՝ ասելով, թե «պատահակա՞ն է, որ հայ-ամերիկյան հանդիպումը կազմակերպվել է Իրանում զանգվածային վերջին ցույցերի ֆոնին»:

Պատգամավոր Խաչատրյանը սեփական ենթադրություններն է ներկայացնում, թե հայ-ամերիկյան վերջին փաստաթուղթը պետք է ստորագրվեր ԱՄՆ փոխնախագահ Ջեյ Դի Վենսի ՀՀ այցի ընթացքում, ապա իր ենթադրության վրա վերլուծում է, թե «ինչի Արարատ Միրզոյանը սենց արագ գնաց [ԱՄՆ-խմբ․]»։ 

Նշենք, որ ավելի վաղ ոչ պաշտոնական տեղեկություններ էին շրջանառվել Վենսի՝ ՀՀ այցի մասին, ԱԳՆ-ն դրանք չէր հերքել կամ հաստատել։ Միևնույն ժամանակ, բաց աղբյուրներում Վենսի՝ ՀՀ այցի շրջանակում համապատասխան փաստաթղթի ստորագրման վերաբերյալ որևէ տեղեկություն չկա։ 

5-րդ ալիքի լրագրողի դիտարկմանը, թե արդյոք կարծում է, որ դա Իրանի հետ է կապված, Խաչատրյանը հաստատել է՝ պնդելով, որ «այդ խնդիրը կա, Իրանում էս անորոշությունների ու ռիսկային ֆոնի վրա է դա տեղի ունեցել»։ 

Հանդիպումը պլանավորվել է Իրանում ցույցերից շաբաթներ առաջ

«Փաստերի ստուգման հարթակը» ՀՀ ԱԳՆ մամուլի քարտուղար Անի Բադալյանից տեղեկացավ, որ դեռևս 2025 թվականի դեկտեմբերի կեսից էր պլանավորվում, որ շատ մոտ ապագայում՝ մեկ ամսվա ընթացքում, պետք է կայանա հայ-ամերիկյան բարձր մակարդակի հանդիպում։ 

Սրան զուգահեռ, Իրանում ցույցերը սկսվել են միայն 2025 թվականի դեկտեմբերի 28-ից՝ ի սզբանե ունենալով միայն սոցիալ-տնտեսական բնույթ, արդեն 2026 թվականի հունվարին դրանք դարձան զանգվածային՝ ընդգրկելով գրեթե ամբողջ Իրանը։ 

Այսպիսով, Միրզոյան-Ռուբիո հանդիպումը պլանավորվել է Իրանում ցույցերից շաբաթներ առաջ, հետևաբար, ենթադրությունների վրա հիմնված պնդումները, թե դրա հանդիպման ժամկետը նպատակաուղղված կերպով ընտրվել է Իրանում ներքին լարվածության ֆոնին, մանիպուլյատիվ են։

Նանե Մանասյան