Չվճարված հարկեր ու կոմունալ պարտքեր․ Նարեկ Կարապետյանի դեմ Մոսկվայի դատարանում երկու գործ կա

2026 թվականի Ազգային ժողովի ընտրություններում «Ուժեղ Հայաստան» կուսակցության պատգամավորի թեկնածու Նարեկ Կարապետյանի Կենտրոնական ընտրական հանձնաժողով ներկայացրած հայտարարագրում արտացոլված չէ իր մասնակցությունը Մոսկվայում տեղակայված «Մոսպրոմէքսպլուատացիա» ՍՊԸ-ում։ 

Հիշեցնենք, որ շաբաթներ առաջ «Փաստերի ստուգման հարթակը» մեկ այլ հետաքննությամբ ներկայացրել էր ՌԴ պետական գերատեսչության կնքած և էլեկտրոնային ստորագրությամբ փաստաթղթի բնօրինակ՝ Կարապետյանի ՌԴ քաղաքացիության մասին մակնշմամբ։ 

ՌԴ իրավաբանական անձանց ռեգեստրի փաստաթուղթն արտացոլում էր «Մոսպրոմէքսպլուատացիա» ՍՊԸ-ում Կարապետյանի մասնակցությունը 2026 թվականի մայիսի 19-ի դրությամբ․ համաձայն որի՝ ՍՊԸ-ում Կարապետյանը մասնակցություն է ունեցել 2020 թվականի օգոստոսի 18-ից։ 

ՀՀ կենտրոնական ընտրական հանձնաժողով ներկայացրած հայտարարագրում, սակայն, այս ընկերության մասին հիշատակում չկա․ նշենք, որ ԿԸՀ հայտարարագրում պետք է ամփոփված լինեին Կարապետյանի գույքի և եկամուտների մասին տեղեկությունները վերջին մեկ տարվա դրությամբ՝ 2025 թվականի ապրիլի մեկից մինչև 2026 թվականի ապրիլի մեկը։ 

Փաստացի, ԿԸՀ-ին ներկայացվող հայտարարագրման ենթակա ժամանակահատվածում Կարապետյանը, ըստ ՌԴ իրավաբանական անձանց ռեգեստրի վերոհիշյալ փաստաթղթի,  ունեցել է մասնակցություն օտարերկրյա ընկերությունում, սակայն այդ տեղեկությունը չի արտացոլվել ներկայացված հայտարարագրում։ 

Հատկանշական է, որ Կարապետյանը հաշվետու ժամանակահատվածի լրանալուց ընդամենը մեկ օր առաջ՝ 2026 թվականի մարտի 31-ին, դադարեցրել է ռուսաստանյան մեկ այլ՝ ՎՕԻԳ ընկերությունում իր մասնակցությունը, որում նա ունեցել է ընկերության 20% մասնաբաժինը՝ 4,4 մլն ռուբլի արժողությամբ։ 

Գործեր Մոսկվայի դատարանում՝ կոմունալներ ու հարկեր չվճարելու համար

«Փաստերի ստուգման հարթակը» պարզել է, որ Նարեկ Կարապետյանը որպես պատասխանող է ներգրավված Մոսկվայի դատարանում երկու տարբեր գործերով (այդ փաստը վկայող փաստաթղթեր կան-խմբ․)․ մասնավորապես, դատական գործերը հարուցվել են նրա Մոսկվայի բնակարանի կոմունալ ծառայությունների վճարներն ու հարկերը չմուծելու համար։ 

Այսպես, Կարապետյանի Մոսկվայի բնակարանն արտացոլված է ԿԸՀ հայտարարագրում, այն գտնվում է ՌԴ մայրաքաղաքի Նամյոտկինի փողոցի, շենք 18, բնակարան 105 հասցեում․ համաձայն հայտարարագրի՝ 128,4քմ է։ 

Մեր ձեռքի տակ հայտնված փաստաթղթերը վկայում են, որ գործերից մեկը դատարան է մտել բոլորովին վերջերս՝ 2026 թվականի մայիսի 20-ին․ դրա համաձայն՝ Կարապետյանը չի վճարել այդ բնակարանի կոմունալ ծախսերի դիմաց վճարները․ գործը սույն հոդվածի հրապարակման պահին ունի անավարտ կարգավիճակ։ 

Գործերից հաջորդը դատարան է մտել 2025 թվականի սեպտեմբերին․ այն ևս անավարտ է, պատճառը Կարապետյանի կողմից հարկեր չվճարելն է։

Նկատենք, որ Կարապետյանը ԿԸՀ ներկայացրած հայտարարագրում նշել է, որ ունի 16,5 մլն դրամ, 1,8 մլն դոլար, 2,1 մլն եվրո․ սրան զուգահեռ, նա հայտարարագրել է 650 000 աշխատավարձ և 56,2 մլն դրամ նվիրատվություն ոմն Հովագիմյան Արթուրի կողմից։ 

Այսպիսով, նոր փաստաթղթերի համաձայն՝ Նարեկ Կարապետյանը ԿԸՀ-ին չի հայտնել մոսկովյան ընկերությունում իր մասնակցության մասին։ Միևնույն ժամանակ,  Մոսկվայում նրա դեմ ընթանում են նաև հարկային ու կոմունալ պարտքերի դատական գործեր։

Նանե Մանասյան 

Ռոման Ուդոտ