ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Երևանի ստորգետնյա անցումների խնդիրներին ծանոթ է թերևս ամեն երևանցի՝ գարշահոտություն, կեղտ, լուսավորության բացակայություն և այլն:
Այդպիսի գետնանցումներից մեկը Գրիգոր Լուսավորիչ — Մաշտոցի պողոտա հատվածինն է: Այսօր այնտեղից օգտվողները սակավաթիվ են անբարեկարգ լինելու պատճառով: Մարդիկ նախընտրում են հատել փողոցը չթույլատրված հատվածներում՝ վտանգելով իրենց կյանքը, միայն թե շրջանցեն այդ գարշահոտ վայրը:
Դեռ 2011թ. հուլիսի 20-ին Երևանի այդ ժամանակվա քաղաքապետ, ներկայիս վարչապետ Կարեն Կարապետյանը աշխատանքային շրջայց կատարեց Կենտրոն համայնքում, եղավ նաև հիշյալ գետնանցումի տարածքում: Կարապետյանը նշել էր, որ գետնանցումների բարեկարգման ծրագրով առաջիկայում կհայտարարվի մրցույթ և հավանական ներդրողներին կներկայացվեն պայմանները, համաձայն որոնց տարածքները կնորոգվեն ու կլուսավորվեն, կապահովվի սանիտարական պատշաճ վիճակ, նաև առևտրային տաղավարներ կառաջարկվեն բիզնեսով զբաղվող քաղաքացիներին: Կարապետյանի բիզնես մտքերը սակայն իրականություն չդառձան:
Երկու տարի անց` 2013 թվականին, արդեն Տարոն Մարգարյանի գլխավորած քաղաքապետարանը ներկայացրեց շինբարեկարգման ծրագիր, որով կարծես թե մեկնարկեցին անցումի նորոգման աշխատանքները:
Ինչպես հաղորդել էր քաղաքապետարանի մամուլի ծառայությունը․ «Համալիր բարեկարգման ծրագրի շրջանակում ամբողջությամբ փոխվում են հատակի բետոնե և բազալտե սալիկները, բարեկարգվում է առաստաղը, ներդրվում է լուսավորության համակարգ գիշերային ժամերին բնակիչների անցուդարձը հարմարավետ ու անվտանգ դարձնելու համար»:
Սակայն ստորգետնյա այս անցումը խոստումներից վեց տարի անց էլ անբարեկարգ է ու գարշահոտ և սա միակ օրինակը չէ։ Մեր համաքաղաքացիներին միայն մնում է ընտրել հատել փողոցը գարշահոտության պայմաններում, թե վտանգելով կյանքը`չթույլատրված հատվածում:
