Լրատվամիջոցները խեղաթյուրում են բողոքի ակցիայի նպատակը

Այսօր՝ դեկտեմբերի 16-ին, Շիրակի բնակիչները փակել են դեպի Վրաստանի սահման տանող Գյումրի-Բավրա, ինչպես նաև Քեթիի և Ազատանի ճանապարհները։ Բողոքի ակցիաներ են ընթանում նաև մարզի այլ հատվածներում՝ պահանջելով տեղեկատվություն տրամադրել անհետ կորած զինծառայողների մասին։

Բողոքի ակցիայի պատճառն օրեր առաջ Հադրութի շրջանի Խծաբերդ և Հին Թաղեր գյուղերի դիրքերից Շիրակի մարզից զորակոչված շուրջ 60 զինծառայողների անհետ կորելու մասին տեղեկությունն է։  

Հայկական մի շարք լրատվամիջոցներ, սակայն, Ազատանի բնակիչների ցույցը ներկայացնում են որպես հակաիշխանական բողոքի ակցիա՝ վարչապետ Նիկոլ Փաշինյանի հրաժարականի պահանջով։ «Ազատան համայնքի բնակիչները փակել են ավտոճանապարհն ու պահանջում են Նիկոլ Փաշինյանի հրաժարականը» վերնագրով նյութեր են հրապարակել tert.am-ը, yerkirmedia.am-ը, 24news.am-ը և այլ կայքեր։ Tert.am-ը հղում է անում Mediaport տելեգրամյան ալիքին՝ գրելով, որ անհնազանդության ակցիաների պատճառը նոյեմբերի 10-ին ստորագրված փաստաթուղթն է, որի համաձայն՝ Արցախի տարածքների մեծ մասը մտնում է Ադրբեջանի կազմի մեջ:

Մինչդեռ, ակցիաների ընթացքում ցուցարարները չեն անդրադառնում Նիկոլ Փաշինյանի հրաժարականի խնդրին։ Ստորև ներկայացված տեսանյութում բողոքի մասնակիցներից մեկը հստակեցնում է, որ իրենց ցույցը քաղաքական չէ, եկել են՝ անհետ կորած զինծառայողների մասին տեղեկություններ ստանալու պահանջով։ «Մենք գերի ունինք, գերիներին կպահանջենք, չենք ելել ընդդիմություն կամ դիմություն խաղալու։ Ամոթ է»,- ասում է ակցիայի մասնակիցներից մեկը։

Ազատան համայնքը գյուղի ֆեյսբուքյան էջում հրապարակմամբ անդրադարձել է շահարկումներին՝ նշելով, որ «Ազատան համայնքում չի հնչել և չի շոշափվել Նիկոլ Փաշինյանի հրաժարականի մասին որևէ խոսք»։

Անի Ավետիսյան