Երբ է «սորոսականացվել» ԵՊՀ-ն․ Yerevan.Today-ի մանիպուլյացիան

Yerevan.Today լրատվական կայքը օգոստոսի 18-ին «Իսկ ե՞րբ եք ԵՊՀ-ն կոչելու Սորոսի անունով» վերնագրով նյութ էր հրապարակել և, հիմք ընդունելով «օդում կախված լուրերը», պնդել, որ Երևանի պետական համալսարանը «սորոսացվում» է։

Կայքը, հղում անելով շրջանառվող լուրերին, նշել էր, որ շուտով ԵՊՀ պրոռեկտորի պաշտոնում նշանակվելու է նախորդ՝ 7-րդ գումարման խորհրդարանի «Իմ քայլը» խմբակցության պատգամավոր Համազասպ Դանիելյանը, և եզրակացրել, որ «Դանիելյանի նշանակմամբ ԵՊՀ-ն ոչ միայն քաղաքականացվում է, այլև սորոսացվում»:

Yerevan.Today-ի հրապարակումը արտատպել էին 7or.am-ը, hayeli.am-ը և մի շարք սունկ կայքեր։

Yerevan.Today-ի հոդվածը, սակայն, մանիպուլյատիվ է։ Կայքը եզրակացնում է, որ համալսարանը «սորոսացվում է» այնտեղ «Բաց հասարակության հիմնադրամներից» դրամաշնորհ ստացած անձանց աշխատելով, մինչդեռ լրատվականը, դիտմամբ, թե պատահմամբ, չի նշել, որ Երևանի պետական համալսարանը հարյուր հազարավոր դոլարների դրամաշնորհներ է ստացել «Սորոսի հիմնադրամից» սկսած 1998 թվականից։

ԵՊՀ-ն երկար տարիներ շարունակ «Սորոսից» դրամաշնորհներ է ստացել 

Այսպես, Ջորջ Սորոսի հիմնադրված «Բաց հասարակությունների հիմնադրամը» Հայաստանում սկսել է գործել 1997 թվականից և երկար տարիներ շարունակ դրամաշնորհներ է տրամադրել պետական տարբեր կառույցների և համալսարանների, այդ թվում՝ ԵՊՀ-ին։ 

16 տարվա ընթացքում՝ 1998-2017 թթ․, Երևանի պետական համալսարանը «Բաց հասարակությունների հիմնադրամից» ստացել է 32 դրամաշնորհ՝ ընդհանուր 767,065 դոլարի։ 

Դրամաշնորհների մի մասը ԵՊՀ-ն ստացել է Yerevan․Today-ի կողմից ակնհայտ աջակցություն վայելող երկրորդ նախագահ Ռոբերտ Քոչարյանի կառավարման տարիներին։ 

Բացի այդ, ԵՊՀ նախկին և ներկա դասախոսական կազմից տասնյակից ավելի դասախոսներ հանդիսանում են «Բաց հասարակությունների հիմնադրամի» կրթաթոշակների շահառուներ, ինչում կարող ենք համոզվել՝ այցելելով հիմնադրամի կայք։ Իսկ Համազասպ Դանիելյանը դասախոսել է ԵՊՀ-ում 2009-2017 թվականներին։

Հետաքրքիր է նշել, որ Yerevan.Today-ի՝ ԵՊՀ-ն «սորոսականացվածությունից» պաշտպանող հրապարակումն արտատպած 7or.am լրատվական կայքը ժամանակին 14,260 հազար դոլարի չափով դրամաշնորհ է ստացել «Բաց հասարակությունների հիմնադրամից»։

Դանիելյանը տեղյակ չէ

«Փաստերի ստուգման հարթակը» կապ հաստատեց Համազասպ Դանիելյանի հետ՝ պարզելու, թե արդյո՞ք նա ունի այդպիսի մտադրություններ: Ի պատասխան, սակայն, ԱԺ նախկին պատգամավորը նշեց, որ առաջին անգամ Yerevan.Today-ի հոդվածից է լսել այդ մասին և հստակեցրեց, որ նման առաջարկ չի ստացել և մտադրություն էլ չունի։

Բացի այդ, կայքը նշել էր, որ Համազասպ Դանիելյանը 2019 թվականից ԵՊՀ հոգաբարձուների խորհրդի անդամ է, ինչը սխալ է: Ինչպես Դանիելյանը նշեց, նա խորհրդի անդամ դառնալու առաջարկ ստացել է դեռ 2018 թվականին, երբ Գալուստ Գյուլբենկյան հիմնդրամի հայաստանյան ներկայացուցիչն էր և չէր զբաղեցնում որևէ պետական պաշտոն։ Եվ հոգաբարձուների խորհրդում Դանիելյանի անդամակցությունն ավարտվել է դեռևս նախորդ տարի։ 2020 թ․ օգոստոսի 9-ին վարչապետ Նիկոլ Փաշինյանը հաստատել էր հոգաբարձուների խորհրդի նոր կազմը, որում Համազասպ Դանիելյանը բացակայում էր։ Նախորդ խորհրդի կազմի լուծարումից հետո ներկայում ժամանակավոր հոգաբարձուների խորհուրդը բաղկացած է 3 անդամից՝ փոխվարչապետ Մհեր Գրիգորյանից, ԿԳՄՍ նախարար Վահրամ Դումանյանից և Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանից։ 

Փաստացի, Yerevan.Today-ի հոդվածը ոչ միայն մանիպուլյատիվ է, այլև պարունակում է փաստական սխալներ։

Հայկ Հովհաննիսյան