«Սորոսին» թիրախավորող 7or.am կայքը հիմնադրամից դրամաշնորհ է ստացել 

7or.am կայքը հատկապես վերջին շրջանում պարբերաբար թիրախավորում է «Բաց հասարակության հիմնադրամներ» կազմակերպությունը, որը հանրության մեջ հայտնի է որպես «Սորոսի հիմնադրամ»։ Կայքը մեղադրում է իշխանություններին չափից ավելի «սորոսացված» լինելու մեջ։ Ըստ 7or.am-ի՝ այդ պատճառով է, որ Նիկոլ Փաշինյանը Կրեմլի հետ «լեզու չի գտնում»։ 

Միաժամանակ, կայքը  կոչ է անում պայքարել «օտարերկրյա թրքասեր այդ գործակալների» դեմ։

Չնայած նման մեղադրանքներին, սակայն, նույն 7or.am կայքը և նրա հիմնադիր Անդրանիկ Թևանյանը, որը ևս ակտիվ քննադատում է գրասենյակի գործունեությունը, ժամանակին չեն «վախեցել» «սորոսահպատակ» և «գրանտակեր» լինելու հեռանկարից և դիմելով հիմնադրամին՝ դրամաշնորհ են ստացել։

Այսպես, Fip.am-ի հարցմանն ի պատասխան «Բաց հասարակության հիմնադրամներ» կազմակերպությունից տեղեկացրեցին, որ 2009 թվականին «Թևանյան» ՍՊԸ-ն ստացել է 14,260 դոլար դրամաշնորհ։

Դրամաշնորհի նպատակը 7or.am կայքում «Բանավեճ» կոչվող բաժին ստեղծելն էր։ Դիմումատուները նշել էին, որ այդ կերպ հնարավոր կլինի ներկայացնել միմյանց հակառակ կարծիքներ՝ երկրում տեղի ունեցող գործընթացների մասին:

Բացի այդ, Սորոսի հիմնադրամի դրամաշնորհի միջոցով կայքի հիմնադիր Անդրանիկ Թևանյանը նախատեսել էր նաև բլոգ։ Ծրագրի շրջանակներում նաև բարելավվել էր կայքի ռուսերեն տարբերակը:

Այսպիսով, իր հոդվածներում հաճախ «Բաց հասարակության հիմնադրամները» թիրախավորող, դրա գործունեությունը Հայաստանում վտանգավոր համարող 7or.am-ը նույնպես եղել է Սորոսի հիմնադրամի դրամաշնորհառու և գրանտի միջոցով զարգացրել է կայքը։

Ավելի վաղ գրել էինք, որ «Բաց հասարակության հիմնադրամները» քննադատող մեկ այլ լրատվամիջոցի՝ «Իրավունք» թերթի հիմնադիր Հայկ Բաբուխանյանը նույնպես ժամանակին հանդիսացել է Սորոսի հիմնադրամի շահառու։

Նելլի Լազարյան