«Սորոսի» հիմնադրամի դրամաշնորհառուները հարկային արտոնություն չեն ստացել

«ՎԵՏՕ» շարժման հիմնադիր, ոստիկանապետի նախկին խորհրդական Նարեկ Մալյանը հունվարի 14-ին Ֆեյսբուքյան իր էջում գրառում է արել՝ հայտարարելով, որ «Բաց հասարակության հիմնադրամների» գրասենյակից ֆինանսավորվող կազմակերպություններն ազատվել են մի շարք հարկերից:

«ՀՀ փոխվարչապետ Տիգրան Ավինյանի N 86-Ա որոշմամբ Սորոսի գրասենյակից ֆինանսավորվող հետևյալ կազմակերպությունները համարվել են «բարեգործական», ազատվել են մի շարք հարկերից»,- մասնավորապես, գրել է Մալյանը:

Նա ներկայացրել է հասարակական կազմակերպությունների անուններ, որոնց շարքում են հայտնվել «Ժուռնալիստների «Ասպարեզ» ակումբը», «Հելսինկյան քաղաքացիական ասամբլեայի Վանաձորի գրասենյակը», «Հանրային լրագրության ակումբը», «Իրազեկ քաղաքացիների միավորումը» և այլն: 

Գրառմանը Մալյանը կցել է նաև փոխվարչապետ Տիգրան Ավինյանի մարտի 2-ին ստորագրած որոշումը: 

Մալյանի գրառումը տարածել են Politik.am, Tert.am, Zham.am, Yerevan.today.am և այլ լրատվականներ։ 

«Փաստերի ստուգման հարթակը» որոշեց պարզել, թե արդյո՞ք Նարեկ Մալյանի գրառումը համապատասխանում է իրականությանը, թե՞ ոչ:

Նշենք, որ հարկերի, տուրքերի, պարտադիր վճարների գծով արտոնությունները լիազորված մարմնի կողմից բարեգործական որակված ծրագրերին տրամադրվում են 2002 թվականին ընդունված «Բարեգործության մասին» օրենքով: Բարեգործական ճանաչված կազմակերպություններն ազատվում են ավելացված արժեքի հարկից և մաքսային տուրքից:

Համաձայն կառավարության N 66-Ն որոշման, որն ուժի մեջ է մտել 2003 թվականին, բարեգործական ծրագիր իրականացնող կազմակերպությունների  հետ աշխատանքը վերահսկում, ինչպես նաև ԱԱՀ-ից ազատելու գործընթացը կատարում է կառավարության բարեգործական ծրագրերի համակարգման հանձնաժողովը:

2018 թվականի օգոստոսի 21-ի N 908-Ն որոշմամբ կառավարության կողմից լիազորված մարմին է ճանաչվել ՀՀ առաջին փոխվարչապետը, իսկ 2019 թվականի մեկ այլ որոշմամբ բարեգործության ոլորտը համակարգում է  փոխվարչապետը:

Հատկանշական է, որ ոչ թե ցուցակում նշված կազմակերպություններն են ազատվել հարկերից, այլ «Բաց հասարակության հիմնադրամներ-Հայաստանը»։

Կազմակերպության գործադիր տնօրեն Լարիսա Մինասյանը Fip.am-ի հետ զրույցում նշեց, որ առաջին անգամը չէ, որ ԲՀՀ Հայաստանը նման արտոնություն է ստանում։ Նա ասաց, որ ամեն տարի, իսկ կարգի փոփոխությունից հետո՝ երկու տարին մեկ հայտ են ներկայացնում բարեգործական ծրագրերի համակարգման հանձնաժողով՝ բարեգործական կարգավիճակը ստանալու նպատակով: Ընդ որում՝ ԱԱՀ-ից ազատվում են միայն ծրագրում նշված ծախսերը և գործողությունները:

««Բաց հասարակության հիմնադրամները» ոչ առաջին, ոչ երկրորդ, ոչ էլ 15-րդ անգամ է այդ արտոնությունները ստանում: 1998 թվականից սկսած՝ ամեն տարի ԲՀՀ-ն որակվել է որպես բարեգործական կազմակերպություն՝ ներկայացնելով և հիմնավորելով իր գործունեությունը: Նախորդ բոլոր կառավարությունները դիտարկել են և շնորհել են այդ կարգավիճակը»,- ասաց Լարիսա Մինասյանը՝ տրամադրելով նաև նախորդ տարիների որոշումները։ 

Նա հայտնեց նաև, որ Նարեկ Մալյանի ներկայացրած ցուցակում հայտնված կազմակերպությունները չեն ազատվել հարկերից, քանի որ այն կազմակերպությունները, որոնց իրենք դրամաշնորհ են տրամադրում, բարեգործական չեն ճանաչվում: Այդ կազմակերպությունների ցանկը հայտնվել է որոշման մեջ, քանի որ այն եղել է ԲՀՀ-ի ներկայացրած ծրագրում, բայց դա չի նշանակում, որ այդ կազմակերպություններն արտոնություններ են ստացել:

Այսպիսով, Նարեկ Մալյանը, ներկայացնելով մեկ տարվա վաղեմություն ունեցող փաստաթուղթ, խեղաթյուրել է փաստերը՝ տպավորություն ստեղծելով, թե նշված բոլոր ընկերությունները ստացել են հարկային արտոնություններ միայն հետհեղափոխական իշխանությունների օրոք: Այնինչ՝ ԱԱՀ-ից, որպես բարեգործական կազմակերպություն, ազատվել է միայն «Բաց հասարակության հիմնադրամները»։ Ընդ որում՝ ԲՀՀ-ն այս արտոնությունները ստացել է մի քանի անգամ՝ 1998 թվականից ի վեր:

Լուսինե Ոսկանյան