Երբ են կրկնվել ԱԺ նախագահների ողջույնի խոսքերը և ինչու

Օրերս համացանցում տարածվեց Ազգային ժողովի նախագահ Արարատ Միրզոյանի և նախկին նախագահ Արա Բաբլոյանի՝ ԱԺ կայքում հրապարակված ողջույնի խոսքերի համեմատությունը։ Հրապարակված լուսանկարում երևում էր, որ այդ ուղերձների տեքստը նույնն է։

Որոշեցինք ստուգել լուսանկարի իսկությունը և ուսումնասիրել, թե ԱԺ նախկին նախագահները կայքի այցելուներին ինչ ողջույնի խոսք են ուղղել մինչ այժմ։

Հանրապետական կուսակցության անդամ Արա Բաբլոյանը ԱԺ նախագահի պաշտոնը զբաղեցրել է 2017 թ. ապրիլից 2018 թ. Նոյեմբեր ամիսներին, իսկ «Իմ քայլը» խմբակցության անդամ Արարատ Միրզոյանն այդ պաշտոնում հաջորդել է նրան։ ԱԺ-ի պաշտոնական parliament.am կայքի արխիվն ուսումնասիրելիս իսկապես հաստատվեց, որ Արարատ Միրզոյանի ուղերձի տեքստը նույնն է, ինչ եղել է Բաբլոյանի ժամանակ։

Միրզոյանի՝ ԱԺ նախագահի պաշտոնը ստանձնելուց հետո, Բաբլոյանի ողջույնի խոսքում որևէ փոփոխություն չի արվել. փոխվել է միայն ԱԺ նախագահի անուն-ազգանունը և լուսանկարը։

Ողջույնի ինչ խոսքեր են ուղղել ԱԺ նախկին նախագահները 

Ինչ վերաբերում է ԱԺ նախկին նախագահներին, ապա համացանցում հնարավոր  եղավ գտնել 6 ողջույնի խոսք՝ Արթուր Բաղդասարյանինը, Հովիկ Աբրահամյանինը, Սամվել Նիկոյանինը, Գալուստ Սահակյանինը, Արա Բաբլոյանինը և Արարատ Միրզոյանինը։

«Օրինաց երկիր» կուսակցության ղեկավար Արթուր Բաղդասարյանն ԱԺ նախագահի պաշտոնը զբաղեցրել է 2003-2006 թթ., նրան հաջորդել է ՀՀԿ-ական Տիգրան Թորոսյանը, ում ողջույնի խոսքը բաց աղբյուրներում չի պահպանվել։

Թորոսյանին փոխարինել է ՀՀԿ-ական Հովիկ Աբրահամյանը։ Վերջինս ԱԺ նախագահի պաշտոնը զբաղեցրել է երկու անգամ՝ 2008թ. սեպտեմբերից 2011թ. նոյեմբերը և 2012թ․մայիսից 2014թ. ապրիլը։ Նրա պաշտոնավարումների միջակայքում ԱԺ նախագահ է եղել ՀՀԿ-ական Սամվել Նիկոյանը։

Ուսումնասիրելով  parliament.am կայքի արխիվը՝ Հովիկ Աբրահամյանի ողջույնի խոսքը չի կրկնում Արթուր Բաղդասարյանի տեքստը։ Սամվել Նիկոյանի՝ ԱԺ նախագահ դառնալուց հետո կայքը այցելուներին դիմում է նոր տեքստով՝ չկրկնելով նախորդին։

Սակայն, Հովիկ Աբրահամյանի՝ պաշտոնին վերադառնալուն զուգահեռ՝ 2012-2014 թթ., կայքում նորից հայտնվում է նույն այն ողջույնի խոսքը, որ կայքում տեղադրված էր նրա առաջին պաշտոնավարման՝ 2008-2011 թթ. ընթացքում։

Ողջույնի այս խոսքն «ամենաերկարակյացն» է կայքում։ Նույն այս ուղերձը տեսնում ենք նաև 2014-2017 թթ., այս անգամ, սակայն, ԱԺ հաջորդ նախագահի՝ Գալուստ Սահակյանի ստորագրությամբ։ Արա Բաբլոյանի՝ ԱԺ նախագահ դառնալուց հետո, տեքստը կրկին փոխվել է։

Ազգային ժողովից պարզաբանում են

Մեր հարցին, թե ինչն է պատճառը, որ ԱԺ նախագահների՝ parliament.am կայքում տեղադրված ողջույնի տեքստերը հաճախ կրկնվում են, Ազգային ժողովի աշխատակազմից պատասխանեցին. «ՀՀ Ազգային ժողովի պաշտոնական կայքի վերափոխման և վերազինման աշխատանքներով պայմանավորված՝ գործող կայքում փոփոխություններ չեն կատարվել»։

Սակայն, ինչպես տեսանք, այս կրկնությունները չեն կարող պայմանավորված լինել զուտ տեխնիկական խնդիրներով, քանի որ, օրինակ, Գալուստ Սահակյանի ողջույնի խոսքը կայքում եղել և մնացել է նրա պաշտոնավարման ողջ ընթացքում։ Ավելին, այս դեպքում նույն տեքստի ստորին հատվածում փոփոխված է ոչ միայն ԱԺ նախագահի անուն-ազգանունը, ինչպես Արարատ Միրզոյանի դեպքում էր, այլև առկա է Սահակյանի ստորագրությունը, որ փոխարինել է Հովիկ Աբրահամյանի ստորագրությանը։

Մարգարիտա Ղազարյան

Հոդվածը հրապարակվել է ՄԱԿ-ի ժողովրդավարության հիմնադրամի կողմից ֆինանսավորվող «Վոչդոգ լրագրության խթանումը Հայաստանում» ծրագրի շրջանակում: Հիմնադրամը պատասխանատվություն չի կրում հրապարակված հոդվածի բովանդակության համար։