Աֆրիկական կոկորդիլոսները հայկական ԶԼՄ-ներում

Վերջերս համացանցում ակտիվորեն շրջանառվում էր տեղեկություն այն մասին, որ Զիմբաբվեյում հոգևորականը Հիսուսի պես քայլել է ջրի վրայով և այդ պահին նրան կերել են կոկորդիլոսները:

Տեղեկությունը տարածվել է բազմաթիվ միջազգային ու ռուսական լրատվական կայքերով ու մեծ մասամբ հենց վերջինների միջոցով էլ հայտնվել ինտերնետի հայկական սեգմենտում:

Կոկորդիլոսի ու հոգևորականի կրոնական արկածների մասին գրել են հայկական այնպիսի խոշոր լրատվական կայքեր, ինչպիսիք են, օրինակ News.am-ը, Tert.am-ը, Armtimes.com-ը, 7or.am-ը և այլն:

Ավելի ուշ, սակայն, պարզվեց, որ այս տեղեկությունը սուտ է: Այսպես, ինչպես պարզել է Mashable կայքը, նման լուր հրապարակվել էր դեռևս 2016 թվականին քենիական eDaily կայքում, ապա և տարածվել այլ ռեսուրսներում` որպես երգիծական նյութ:

Նկատենք, որ զիմբաբվեական կոկորդիլոսի ու հոգևորականի տխուր ճակատագրի մասին լուրը հայկական համացանցային տիրույթում հայտնվեց մայիսի 15-ին, այսինքն Երևանի ավագանու ընտրություններից մեկ օր անց: Հավանաբար այս է պատճառը, որ ընտրական գործընթացներից ծարավացած լրատվական դաշտը այդպիսի ախորժակով ընդունեց աֆրիկական դրաման:

Այս դեպքը, սակայն, նաև ցույց է տալիս, որ հայկական լրատվական ռեսրուսները կարող են լինել անչափ խոցելի, երբ խոսքը գնում է ոչ ստույգ ու սուտ տեղեկատվություն տարածելու մասին: