Մեկ անձից գնումները չեն ավելացել 72 տոկոսով. Ռոբերտ Քոչարյանը սխալվում է

ՀՀ երկրորդ նախագահ Ռոբերտ Քոչարյանի յութուբյան ալիքում օգոստոսի 27-ին հրապարակվեց «Տնտեսությունը լուծումներ է պահանջում. քննարկում տնտեսական թեմաներով Ռոբերտ Քոչարյանի հետ» խորագրով տեսանյութը, որում Քոչարյանը տնտեսական մասնագետների հետ քննարկում է մի շարք թեմաներ՝ քննադատելով ներկա իշխանությունների աշխատանքը:

Անդրադառնալով կոռուպցիայի խնդրին՝ Քոչարյանը, մասնավորապես, հայտարարեց. «Վերջին երկու տարվա ընթացքում մեկ աղբյուրից գնումներն աճել են 72 տոկոսով: Պետական գնումները կոռուպցիայի համար ամենից գայթակղիչ ոլորտն է՝ պետական կառավարման ոլորտում: Եվ այստեղ 72 տոկոսով աճել է։ Ո՞նց մենք հավատանք, թե պայքար է գնում կոռուպցիայի դեմ: Ո՞նց մենք հավատանք, թե համակարգային կոռուպցիա չկա»:

Հաշվի առնելով փաստը, որ մեկ անձից, այսինքն՝ առանց մրցույթի կատարվող պետական գնումները և դրանցում առկա կոռուպցիոն ռիսկերը մշտապես հանրության քննարկման առարկա են, «Փաստերի ստուգման հարթակը» որոշեց ստուգել Քոչարյանի հայտարարությունը և դրա համապատասխանությունն իրականությանը:

Մեկ անձից գնումների ընդհանուր թիվը նվազել է

Պետական գնումները հրապարակվում են armeps.am և gnumner.am կայքերում: Եվ այս կայքերում առկա վիճակագրությունը հակասում է Ռոբերտ Քոչարյանի պնդմանը:

Այսպես, ըստ Armeps.am-ի տվյալների՝ 2020 թվականի ութ ամիսների ընթացքում կնքվել է մոտ 10 հազար պայմանագիր՝ «մեկ անձից» և «հրատապ մեկ անձից» գնման ընթացակարգերով: 

2019-ին նշված ընթացակարգերով կնքված պայմանագրերի թիվը շուրջ 24 հազար է: Նախքան հեղափոխությունը՝ 2017 թվականին, կնքվել է շուրջ 38 հազար «մեկ անձից» և «հրատապ մեկ անձից» գնման ընթացակարգերով պայմանագիր: Այսինքն, 2017 թվականի համեմատ, 2019-ին մեկ անձից գնման ընթացակարգով գնումների թիվը նվազել է շուրջ 37 տոկոսով: 

Նշենք, որ այս ցուցակում ներառված են տեղեկություններ պետական կառավարման և տեղական ինքնակառավարման մարմինների, Փակ բաժնետիրական ընկերությունների և հիմնադրամների կողմից կայացված գնման ընթացակարգերից:

Պետական կառավարման ոլորտում ևս առանց մրցույթի գնումները չեն ավելացել

Պատկերը գրեթե նույնն է նաև պետական կառավարման մարմինների կողմից կատարված գնումների պարագայում: Այս դեպքում, սակայն անհրաժեշտ է նշել, որ 2020-ի ութ ամիսների ընթացքում մեկ անձից գնումների թիվը զգալիորեն ավելացել է: Սակայն կարելի է նաև ենթադրել, որ այս հանգամանքը կապված է կորոնավիրուսի համավարակով և մրցույթ հայտարարելու ժամանակի սղության պատճառով:

E-gov.am-ից տեղեկանում ենք, որ 2020 թվականի հունվար-օգոստոս ամիսների ընթացքում կնքվել է մեկ անձից գնման 3226 պայմանագիր, ինչը շուրջ 35 տոկոսով ավելի է ամբողջ  2019-ի ընթացքում կնքված պայմանագրերի քանակից: Այնուամենայնիվ, տարբերությունը նախահեղափոխական շրջանից նկատելի է: 2016-ին կնքվել էր, ընդհանուր առմամբ, 5739 գնման պայմանագիր, 2017-ին՝ 4648: 

Այսպիսով, Ռոբերտ Քոչարյանի հայտարարությունը, թե մեկ անձից գնումները ավելացել են 72 տոկոսով, չի համապատասխանում իրականությանը:

Անի Ավետիսյան