Առաջին իսկ օրից Ադրբեջանը թիրախավորել է նաև ՀՀ տարածքը՝ մասնավորապես Վարդենիսի շրջանը

Ադրբեջանի պաշտպանության նախարարությունը սեպտեմբերի 29-ի առավոտյան հայտարարություն էր տարածել՝ մեղադրելով ՀՀ-ին Վարդենիսի շրջանից Ադրբեջանի Դաշքեսանի շրջանը հրթիռակոծելու մեջ։

ՀՀ արտաքին գործերի նախարարությունն անմիջապես հերքեց հայտարարությունը՝ նշելով, որ այն բացարձակ սուտ է։ «Այս ապատեղեկատվությունը բացարձակ սուտ է և նպատակ ունի հող նախապատրաստել մարտական գործողությունների աշխարհագրության ընդլայնման, այդ թվում՝ ագրեսիա իրականացնել Հայաստանի Հանրապետության դեմ», — գրել էր ԱԳՆ մամուլի խոսնակ Աննա Նաղդալյանը։

Բացի այդ, առկա փաստերը ապացուցում են, որ Ադրբեջանը դեռ օրեր առաջ է թիրախավորել ՀՀ խաղաղ բնակչությանն ու գյուղերը։

Այսպես, թեև Ադրբեջանը 2020 թ. սեպտեմբերի 27-ի վաղ առավոտյան ռազմական բուն գործողությունները սկսել էր Արցախի շփման գծի ամբողջ երկայնքով, սակայն առաջին իսկ օրից ադրբեջանական զինուժը թիրախավորել էր նաև Հայաստանի Հանրապետության տարածքը՝ նույն Վարդենիսի շրջանը։

ՊՆ ներկայացուցիչ Արծրուն Հովհաննիսյանը սեպտեմբերի 27-ին պատերազմական գործողությունների մեկնարկից հետո լրագրողների հետ ճեպազրույցի ժամանակ տեղեկացրել էր, որ վաղ առավոտից Վարդենիսի տարածաշրջանը հրետակոծվել է։

Իսկ «Փաստերի ստուգման հարթակը» նույն օրը տարածել էր տեսանյութ, թե ինչպես են Վարդենիսի հարակից Լուսակունք գյուղի բնակիչները գյուղի հարակից տարածքից հավաքում խոցված ադրբեջանական ԱԹՍ-ի կտորները։

Լուսակունք գյուղի բնակիչները Fip.am-ին հայտնել էին, որ սեպտեմբերի 28-ին ևս գյուղի շրջակայքում խոցվել էր մեկ ադրբեջանական ԱԹՍ։

Սեպտեմբերի 29-ին ՀՀ ՊՆ մամուլի քարտուղար Շուշան Ստեփանյանը հայտնել էր, որ Ադրբեջանի զինված ուժերը կրակ են վարել ՀՀ ԶՈՒ Վարդենիսի զորամասի, ինչպես նաև օդուժ են կիրառել դիրքերի ուղղությամբ։

Արծրուն Հովհաննիսյանն էլ իր ֆեյսբուքյան էջում տեղեկացրել է, որ Վարդենիսում քաղաքացիական ավտոբուսն է այրվում ԱԹՍ-ի հարվածից: Գեղարքունիքի մարզպետն էլ հրապարակել է լուսանկաներ։

Լուսանկարները՝ Գեղարքունիքի մարզպետ Գնել Սանոսյանի ֆեյսբուքյան էջից

Արտաքին գործերի նախարար Զոհրաբ Մնացականյանն էլ քիչ առաջ հայտնեց, որ Ադրբեջանը կիրառելով Թուրքիայի ԱԹՍ-ները Վարդենիսի քաղաքի ուղղությամբ՝ պատճառել է քաղաքացիական բնակչության կորուստներ:

Այսպիսով, Ադրբեջանը թիրախավորել է ՀՀ խաղաղ բնակչությանն ու քաղաքացիական ենթակառուցվածքները դեռ սեպտեմբերի 27-ից։ Ավելին, այս պահին Ադրբեջանը շարունակում է կրակի տակ պահել՝ Հայաստանի խաղաղ բնակչությանը։

Նելլի Լազարյան