Ադրբեջանական մեդիան գործում է աբսուրդի ժանրում, Քոչարյանի վիրավորվելու մասին լուրը կեղծ է

Ադրբեջանական լրատվամիջոցներն այս օրերին ակտիվորեն ապատեղեկատվություն են տարածում՝ երբեմն անցնելով նաև աբսուրդի սահմանները։

Այսպես, օրինակ, ադրբեջանական freeazerbaijan.info կայքը, այսօր՝ հոկտեմբերի 2-ին տեղեկություն էր հրապարակել, թե երկրորդ նախագահ Ռոբերտ Քոչարյանը ծանր վիրավորվել է։ 

Ուշագրավ է, որ կայքը նաև հաստատում է, որ Ադրբեջանը հրթիռակոծել է Ստեփանակերտը, ինչի հետևանքով մեծ վնասներ են հասցրել քաղաքին։ Ըստ վերոնշյալ կայքի, այդ ընթացքում, իբր, վիրավորվել է նաև Հայաստանի երկրորդ նախագահ Ռոբերտ Քոչարյանը, որը գտնվում է ծայրահեղ ծանր վիճակում։

FIP.am-ի հետ զրույցում Քոչարյանի գրասենյակի ղեկավար Վիկտոր Սողոմոնյանը հերքեց այդ տեղեկությունները։ «Կեղծիք է, իհարկե կեղծիք է»,- ասաց նա։ 

Նելլի Լազարյան