Ջորջ Սորոսը չի ձերբակալվել․ մի կեղծված փաստաթղթի պատմություն

Նոյեմբերի 23-ին մի շարք լրատվականներ տեղեկություններ տարածեցին, թե ամերիկացի գործարար Ջորջ Սորոսը ձերբակալվել է Ֆիլադելֆիայում։ Ըստ այս կայքերի՝  Սորսը ձերբակալվել է ԱՄՆ ընտրություններին միջամտելու համար։ 

Տեղեկությունն արագ տարածվեց սոցցանցերում։ Այն հրապարակեցին նաև iravaban.net, politik.am կայքերը, իսկ Hraparak.am-ը տարածեց, ապա ջնջեց հոդվածը։ Կայքերը որպես լուրի սկզբնաղբյուր հղում են անում կանադական Conservative Beaver պարբերականին։ Այս լուրն առաջինը տարածողներից էր նաև Your News Wire լրատվականը։ Երկու կայքն էլ հայտնի են որպես ապատեղեկատվություն  և դավադրության տեսություններ տարածողներ։ 

Conservative Beaver-ն իր հրապարակման մեջ ներառել է սոցիալական ցանցերում տարածվող հրապարակումներ՝ Սորոսի ձերբակալության մասին և մեղադրական եզրակացության մի փաստաթուղթ, որում ներկայացված են հանցանքները, որոնցում իբրև մեղադրվում է Սորոսը։ «Մեղադրական եզրակացության մեջ խոսքը հանցավոր գործունեության մասին է, որին Սորոսը մասնակցել է ընտրություններից առաջ։ Դրանք են՝ էլեկտրոնային հաղորդակցության միջոցների օգտագործմամբ խարդախությունը, անձնական տվյալների գողությունն ու համակարգիչների խափանումը»,- գրում են լրատվականները։ 

Սակայն իրականում այս մեղադրական եզրակացությունը որևէ կերպ կապ չունի Սորոսի հետ, իսկ փաստաթղթի վրա վերջինիս անունը ավելացվել է ֆոտոշոփի միջոցով։

Իրական փաստաթուղթը հրապարակվել էր այս տարվա հոկտեմբերին՝ ամերկյան Bellingcat-ի կողմից։ Վերը նշված հանցագործությունների մեջ մեղադրվում էին ռուսաստանցի վեց հաքեր։ Զավեշտալի է, որ կանադական պարբերականն  ամերիկացի գործարարին վերագրել էր կիբերհանցագործություններ, որոնք, փաստացի, կատարվել են ռուս հաքերների կողմից։

Նշվում է նաև, թե իբր դատավորն արգելել է Սորոսի ձերբակալության մասին հրապարակումներն ամերիկյան լրատվամիջոցներում, «սակայն այդ օրենքները չեն տարածվում կանադական ԶԼՄ-ների վրա»։ Սակայն ԱՄՆ-ում դատավորները իրավասություն չունեն արգելելու դատական գործի լուսաբանումը։ Միակ սահմանափակումը կարող է լինել գործում ներգրավված անձանց նկատմամբ արգելքը՝ հարցազրույցներ տալ մեդիային։

Այսպիսով, մամուլում տարածվող տեղեկությունները և ներկայացված փաստերը՝ իբրև Ջորջ Սորոսը ձերբակալվել է ԱՄՆ ընտրություններին միջամտելու համար, չեն համապատասխանում իրականությանը։

Անի Ավետիսյան