Լիազոր մարմնի ի՞նչ որոշում էր պահանջում Արծվիկ Մինասյանը ոստիկանից

Հայ հեղափոխական դաշնակցության անդամ Արծվիկ Մինասյանը դեկտեմբերի 8-ին անհնազանդության ակցիաներ իրականացնելու ժամանակ հայտարարել է, որ ոստիկանությունն ապօրինություն է թույլ տալիս։

Մինասյանը բողոքել է, որ ոստիկանությունն ակցիայի մասնակիցներին հավաքի վայրից հեռացնում է անօրինական, քանի որ, ըստ նրա, «Հավաքների ազատության մասին» օրենքի համաձայն՝ դրա համար «լիազոր մարմնի որոշում պետք է լինի»։

«Խնդրում եմ տվեք ձեր որոշումը»,- Երևան քաղաքի հասարակական կարգի ապահովման տեսուչից պահանջել է Մինասյանը։

Ոստիկանության ներկայացուցիչը, ի պատասխան, ասել է, որ լիազոր մարմնի որոշում լինում է միայն այն դեպքում, եթե հավաքի անցկացման իրազեկում է լինում։  

«Ոչ, ոչ միայն, ինքնաբուխ կամ շտապ հավաքի ժամանակ դուք որպես ոստիկանություն պետք է ունենաք լիազոր մարմնի որոշումը, ձեր եզրակացությունը»,- հակադարձել է Մինասյանը։

«Փաստերի ստուգման հարթակը» փորձեց պարզել, թե լիազոր մարմնի ի՞նչ որոշում էր պահանջում Արծվիկ Մինասյանը, և արդյո՞ք կար օրենքի խախտում։ 

Լիազոր մարմնի ի՞նչ որոշում էր պահանջում Արծվիկ Մինասյանը

«Հավաքների ազատության մասին» օրենքի 9-րդ հոդվածով սահմանվում է, որ հանրային հավաք անցկացնելու համար կազմակերպիչը գրավոր իրազեկում է լիազոր մարմնին` բացառությամբ մինչև 100 մասնակից ունեցող, շտապ և ինքնաբուխ հավաքների։ Լիազոր մարմինը հավաքն ի գիտություն է ընդունում կամ՝ քննարկումից հետո, օրենքի պահանջներից ելնելով, արգելում։ Լիազոր մարմինը համայնքի ղեկավարն է, այս դեպքում՝ Երևանի քաղաքապետը:

Լիազոր մարմնի որևէ այլ տեսակի որոշման մասին հիշատակում օրենքում չկա: Հավաքը դադարեցնելու, որևէ կերպ անցկացնելու կամ ոստիկանության այլ որոշումները, «Հավաքների ազատության մասին» օրենքի համաձայն, չեն համարվում լիազոր մարմնի որոշում: Ըստ այդմ, անհասկանալի է, թե լիազոր մարմնի ի՞նչ որոշման մասին է խոսում Արծվիկ Մինասյանը:

Նելլի Լազարյան