Պաշտպանության նախարարությունը լռում է սահմանային միջադեպերի մասին

Հայաստանի պաշտպանության նախարարության պաշտոնական հաղորդագրություններում նշվում է, որ փետրվարի 11, 12 և 13-ին ՀՀ պետական սահմանի հայ-ադրբեջանական շփման գծի ամբողջ երկայնքով սահմանային միջադեպեր չեն արձանագրվել։

Այնինչ, փետրվարի 11-ին և 13-ին Սյունիքի մարզի Ադրբեջանի հետ շփման գծի երկայնքում նշված օրերին առնվազն երկու միջադեպ է գրանցվել։

Խնձորեսկ, փետրվարի 11

Այսպես, ըստ Խնձորեսկի գյուղապետարանի, փետրվարի 11-ին Խնձորեսկի մի բնակիչ 185 գլուխ ոչխարների հոտը արածեցնելով մոտեցել է սահմանին, որտեղ զինված ադրբեջանցիները մոտեցել են նրան և, հոտից թողնելով ընդամենը 12 գլուխ ոչխար, հեռացել են: Դրանից հետ տեղանք են ժամանել հայ սահմանապահները, գյուղի բնակիչները, համայնքապետ Երվանդ Մալունցը և առաջին բանակային կորպուսի հրամանատարությունը։ Բանակցությունների արդյունքում հովվին է վերադարձվել 172 ոչխար։

Ագարակ-Եղվարդ, փետրվարի 13

Իսկ Կապան խոշորացված համայնքի մեջ մտնող Ագարակ և Եղվարդ գյուղերի հատվածում միջադեպ է գրանցվել փետրվարի 13-ին։ Այսօր՝ փետրվարի 15-ին, Մարդու իրավունքների պաշտպան Արման Թաթոյանը հրապարակեց Ագարակ ու Եղվարդ գյուղերի միջնամասում տեղակայված դիրքապահների կողմից արված մի տեսանյութ, որում լսվում և երևում է, թե ինչպես են ադրբեջանական կողմից կրակում տարբեր տրամաչափի զինատեսակներից։ 

Fip.am-ի հետ զրույցում փետրվարի 13-ին ադրբեջանցի զինվորների կրակոցների փաստը հաստատեց նաև Ագարակ գյուղի վարչական ղեկավար Հայկ Սահակյանը։

Պաշտպանության նախարարության արձագանքը

«Փաստերի ստուգման հարթակին» չհաջողվեց կապ հաստատել Պաշտպանության նախարարության հետ, սակայն shantnews.am-ի հետ զրույցում ՊՆ-ից պարզաբանել են, որ ադրբեջանական կողմը հիմնականում օդ է կրակում, ինչի մասին հայկական կողմն անմիջապես տեղեկացնում է տարածքում տեղակայված ռուս խաղաղապահներին: 

Այսպիսով, կարող ենք արձանագրել, որ Պաշտպանության նախարարությունը, փաստացի, հանրությանը չի հայտնել վերը բերված երկու միջադեպերի մասին՝ ներկայացնելով, թե փետրվարի 11, 12 և 13-ին սահմանային միջադեպեր տեղի չեն ունեցել։

Հովհաննես Նազարեթյան