Մեղրիի և Ագարակի գազամատակարարումը շարունակ ձգձգվում է

Իրանի և Հայաստանի կառավարությունները դեռևս 2011թ. դեկտեմբերին ստորագրել են փոխըմբռնման հուշագիր՝ Հայաստանին օժանդակություն հատկացնելու վերաբերյալ։

Հուշագրի շրջանակներում Իրանի կառավարությունը «ՀայՌուսգազարդ» ՓԲԸ-ին (այժմ՝ «Գազպրոմ Արմենիա») տրամադրել է 2 միլիոն դոլարի դրամաշնորհ՝ Սյունիքի մարզի Մեղրի և Ագարակ քաղաքներում բնակչության համար գազամատակարարման ցանց կառուցելու նպատակով:

Ծրագիրը նպատակ է հետապնդում բնակարաններ բնական գազ մատակարարելու միջոցով բարելավել այդ քաղաքների բնակիչների սոցիալական վիճակը և պակասեցնել տարածաշրջանում անտառահատումները:

Դրամաշնորհը ստանալուց 5 տարի անց՝ 2016 թվականի դեկտեմբերի 21-ին, էներգետիկ ենթակառուցվածքների և բնական պաշարների նախարարությունը հայտարարեց՝ ավարտվել են Իրանի հետ սահմանամերձ Մեղրի և Ագարակ համայնքների գազի բախշման ցանցի կառուցման աշխատանքները։ Քաղաքներում վառվեց խորհրդանշական կրակը և տրվեց գազամատակարարման մեկնարկը։ Միջոցառումը համընկավ Իրանի նախագահ Հասան Ռոհանիի Հայաստան կատարած այցի հետ։ Սակայն, ո՛չ Մեղրիի և ո՛չ էլ Ագարակի բնակիչները առ այսօր բնակարաններում բնական գազ չունեն:

Մեր հարցին ի պատասխան համայնքապետարաններից պատասխանեցին, որ տեղյակ չեն, թե աշխատանքներն ինչ փուլում են և երբ բնակիչները գազ կունենան։

Խնդրի վերաբերյալ փորձեցինք պարզաբանում ստանալ Էներգետիկ ենթակառուցվածքների և բնական պաշարների նախարարությունից։ Մեր հարցմանը ի պատասխան ստացված գրությամբ տեղեկացանք, որ գործընթացը դեռևս ավարտված չէ, գտնվում է գույքի նկատմամբ իրավունքների պետական գրանցման փուլում, թեպետ 2016 թվականին նույն գերատեսչությունը հայտարարել էր գազամատակարարման մեկնարկը տալու մասին։

Այսպիսով, Մեղրի և Ագարակ համայնքների բնակիչները փաստացի շարունակում են մնալ առանց կապույտ վառելիքի` չնայած դրա համար առկա բոլոր նախադրյալների։ Կարող ենք արձանագրել, որ այս համայնքներում ակնհայտ «դրայվի» պակաս է զգացվում։