Պարեկային ծառայողներն ունեն և՛ զենք, և՛ փամփուշտ

Yerevan.Today կայքը հոկտեմբերի 4-ին «Պարեկային ծառայողներին խաղալիք զենք են բաժանել կամ գլոկ ատրճանակ՝ առանց փամփուշտի» վերնագրով հոդված էր հրապարկել, որում, հղում անելով իր աղբյուրին, գրել էր, թե ոստիկանության պարեկային ծառայողներին զինել են ատրճանակով, սակայն փամփուշտներ չեն տրամադրել։

Կայքը, մասնավորապես հղում անելով ոստիկանության անանուն աղբյուրին, նշել էր, որ նման որոշումը, իբրև, պայմանավորված է պարեկային ծառայողների նկատմամբ ունեցած անվստահությամբ։ «Պարզվում է՝ երիտասարդ պարեկների հանդեպ գործատուն մեծ անվստահություն ունի, արդեն մի քանի օր է՝ զենքերն ամրակցված են տղաներին՝ առանց փամփուշտի։ Դիտավորյալ են դատարկ պարկուճներով զենքեր բաժանվել, որպեսզի խուսափեն «պատահաբար արձակվող կրակոցների ծանր հետևանքներից»,— գրել էր կայքը։

Հրապարակումն արտատպել էր նաև Politik.am կայքը։

«Փաստերի ստուգման հարթակը» պարզեց, որ լրատվականի այս հրապարակումը չի համապատասխանում իրականությանը։

Ոստիկանության հասարակայնության հետ կապերի վարչության պետ Աշոտ Ահարոնյանը FIP.am-ի հետ զրույցում հաստատեց պարեկներին զենք տրամադրելու մասին լուրը, հաստատեց նաև վերջինների՝ փամփուշտներով ապահովված լինելու հանգամանքը, իսկ լրատվականների պնդումը համարեց կեղծ լուր։ «Արդեն 4-5 օր է, ինչ պարեկները զենք են կրում»,- ասաց Ահարոնյանը։ Ինչ վերաբերում է փամփուշտներին, վերջինս զարմացավ․ «Զենքն առանց փամփուշտի ինչպե՞ս է հնարավոր»։

Ոստիկանության Պարեկային ծառայությունից ևս FIP.am-ին հայտնեցին, որ պարեկներին հատկացվել են «Գլոք» տեսակի ատրճանակներ և 30 փամփուշտ։

Ինչ վերաբերում է պարեկների անփորձությանը, ապա Պարեկային ծառայությունից հայտնեցին, որ ոստիկանության Պարեկային ծառայությունում պաշտոնի նշանակվելու նպատակով ոստիկանության կրթահամալիրում անցկացվել էր 40 ժամ կրակային պատրաստության դաս, և պարեկներին տրամադրվել էր 40 փամփուշտ, իսկ ուսուցման նոր փուլի համար նախատեսվում է 44 ժամ և 45 փամփուշտ: Այսինքն, պնդումը, թե պարեկային ծառայողները պատրաստ չեն զենք կրելուն, ևս չի համապատասխանում իրականությանը։

Ամփոփելով՝ փաստենք, որ կայքի հրապարակումն այն մասին, թե պարեկային ծառայողներին հատկացվել է ատրճանակ, սակայն դատարկ փամփշտակալներով՝ չի համապատասխանում իրականությանը։ Ոստիկանության պարեկային ծառայողներն ունեն և՛ ատրճանակ, և՛ փամփուշտներ։

Սևադա Ղազարյան