Ռուսաստանի նախագահի խոսնակ Դմիտրի Պեսկովի դուստրը՝ Լիզա Պեսկովան, որոշել է վերլուծաբան դառնալ։ Ռուսական Forbes ամսագրում հրապարակված «Գիտելիքի պատրանք։ Արդյո՞ք ժամանակակից տեխնոլոգիաները կվերացնեն ավանդական կրթությունը» հոդվածում Պեսկովան անդրադառնում է արդի կրթությանը, դրա տրանսֆորմացիային․ ավանդականից՝ տեխնոլոգիականի։
Պեսկովայի առաջին իսկ հրապարակումը մեծ աղմուկ բարձրացրեց, նրան մեղադրեցին գրագողության մեջ։
Պարբերություններից մեկը Պեսկովան copy – paste է արել mel.fm խմբագրության 2016 թվականի հրապարակումից։ Մեկ այլ պարբերություն, չնչին ձևափոխություններով, համընկել է կանացի Passion ամսագրի 2011 թվականի հրապարակման հետ։
Նշենք, որ գրագողության մասին պարզ դառնալուց հետո հոդվածը անհետացավ Forbes-ից, սակայն որոշ ժամանակ անց հայտնվեց՝ արդեն վերոնշյալ հղումներով։
Նյութն առանց հղումների, սակայն, պահպանվել է Google cache-ում։
ՌԴ նախագահի խոսնակի դուստրը սովորում է Փարիզում, նա բավականին ակտիվ է Instagram-ում, այստեղ կարելի է տեսնել Պեսկովայի ժամանցի և այցելությունների լուսանկարները։ Այսպես, օրինակ հուլիսին Պեսկովան ժամանել էր Չեչնիայի մայրաքաղաք Գրոզնի, որտեղ պարել է վերջինիս ղեկավար Ռամզան Քադիրովի հետ։
