Նախորդ օրը ռուսալեզու լրատվամիջոցներում և տելեգրամ ալիքներում, այդ թվում՝ Meduza-ի ալիքում լուր տարածվեց այն մասին, որ S7 Airlines (Siberia Airlines) ավիաընկերությունը չեղարկել է բոլոր միջազգային թռիչքները դեպի ԱՊՀ երկրներ, ինչը կապված է Հայաստանում «կալանքի վերցված» ինքնաթիռի հետ։
«Ավելի վաղ «Ուրալյան ավիաուղիների» Մոսկվա-Երևան օդանավը իջեցրել են Միներալնիե Վոդիի օդանավակայանում։ Ուղևորները բացատրում են դա նրանով, որ Հայաստանը հենց հիմա է միացել սանկցիաներին»,- գրել է Meduza-ն՝ հղում անելով «Можем объяснить» տելեգրամ-ալիքին։
Տարածքային կառավարման և ենթակառուցվածքների նախարարության ջրային և օդային տրանսպորտի քաղաքականության վարչության պետը «Արմենպրեսի» հետ զրույցում հերքել էր Երևանում «կալանավորված» ինքնաթիռի վերաբերյալ լուրը։
Ավելի ուշ Քաղաքացիական ավիացիայի կոմիտեն Ֆեյսբուքի իր էջում գրեց, որ Երևան ժամանելուց ժամեր առաջ «Սիբիր» ավիաընկերության (Siberia Airlines) կողմից շահագործվող ինքնաթիռի մոտ, երբ այն դեռևս գտնվում էր ՌԴ օդային տարածքում, ի հայտ են եկել տվյալ ինքնաթիռի թռիչքային պիտանելիության ապահովման հետ կապված փաստաթղթային խնդիրներ։
Տելեգրամ ալիքներում նշվում էր, որ ինքնաթիռը կանգնացնելու պատճառը, ըստ երևույթին, կապված է լիզինգային ընկերությունների հետ, որոնք փոխանցել են եվրոպական և ամերիկյան ինքնաթիռները ռուսական ավիաընկերություններին և հիմա հարկադրում են հետ վերադարձնել դրանք։
ՔԱԿ-ի տարածած պարզաբանման մեջ նշվում էր՝ «Քաղաքացիական ավիացիայի կոմիտեն ծագած խնդիրների առնչությամբ ճշգրտող նամակագրություն է իրականացնում ինքնաթիռի գրանցման երկրի ավիացիոն իշխանությունների հետ»:
Քաղաքացիական ավիացիայի Թռիչքային պիտանելիության վարչության պետ Կարեն Գյուրջյանը Fip.am-ի հետ զրույցում ևս նշեց, որ դեռևս չեն ստացել պարզաբանումներ ինքնաթիռը շահագործողից և ՌԴ ավիացիոն իշխանություններից։
«Քաղաքացիական ավիացիայի կոմիտեն հարցումներ է ուղարկել շահագործող ավիաընկերությանը և Ռուսաստանի Դաշնության ավիացիոն իշխանություններին։ Պատասխանները դեռևս չեն ստացվել։ Պարզաբանումները ստանալուց հետ ինքնաթիռի շահագործումը կվերականգնվի»,- ասել է Կարեն Գյուրջյանը։
Դավիթ Գյուրջյանը, մասնավորապես, նշում է, որ այս պահին խնդիր է ծագել միայն տվյալ ավիաընկերության հետ։
Թռիչքային պիտանելիության վարչության պետը նաև բացատրեց լիզինգային ընկերությունների հետ կնքված պայմանագրերի առանձնահատկությունները։
«Լիզինգային պայմանագրերը բացառապես լիզինգային ընկերության և մյուս կողմի միջև կնքված հարցեր են, կախված այն հանգամանքից, թե պայմանագրում ինչ կետեր են ներառվել, լիզինգային ընկերությունը կարող է որոշել հարկադրել հետ վերադարձնել ինքնաթիռը, հնարավոր է լինեն դեպքեր, երբ կնքված պայմանագրով նման պահանջներ ներառված չլինեն, հնարավոր է ինքնաթիռը վարձակալության տրված լինի»,- նշում է Կարեն Գյուրջյանը։
Ինչ վերաբերում է Հայաստանի՝ պատժամիջոցներին միանալուն, ապա Էկոնոմիկայի նախարարությունից և Քաղաքացիական ավիացիայի կոմիտեից հերքում են այդ տեղեկությունը։
Շուշան Ստեփանյան
Մհեր Թարոյան