Լավրովը խորհուրդ չի տվել ընդդիմադիրներին վերադառնալ խորհրդարան. Արման Բաբաջանյանը սխալվում է

«Հանուն Հանրապետության» կուսակցության նախագահ, ԱԺ նախկին պատգամավոր Արման Բաբաջանյանը Պետրոս Ղազարյանի հետ հարցազրույցում հայտարարել է, որ Ռուսաստանի արտաքին գործերի նախարար Սերգեյ Լավրովը խորհուրդ է տվել բողոքի ակցիաներ անող ընդդիմադիրներին վերադառնալ խորհրդարան: 

Խոսելով ընդդիմադիր երկու խմբակցությունների անունից ՌԴ պետդումայի նախարար Վյաչեսլավ Վոլոդինին ուղղված նամակի մասին՝ Բաբաջանյանը նշել է, որ այն նաև արտահոսել է հենց Վոլոդինի միջոցով՝ ցույց տալու այն վերաբերմունքը, որ ունեն Ռուսաստանի իշխանություններն «այդ խմբակի հանդեպ»: 

«Այսօր Լավրովն էլ ուղղակի խոսեց, որ նրանց սակավամարդությունը և առհասարակ հավաքների բազմամարդությունը տպավորություն չի թողնում, ուստի չի էլ ցանկանում մեկնաբանել նրանց գործողությունները և խորհուրդ է տալիս գնալ խորհրդարան և օգտվել այն կարևոր հարթակից, որը վերապահված է նրանց»,- ասել է Բաբաջանյանը: 

Իրականում, սական, ՌԴ արտաքին գործերի նախարարը նման հայտարարություն չի արել:

Հունիսի 8-ին Հայաստան է ժամանել Ռուսաստանի արտաքին գործերի նախարարը: Հունիսի 9-ին Հայաստանի և Ռուսաստանի արտաքին գերատեսչությունների ղեկավարների համատեղ ասուլիսին Արարատ Միրզոյանին հարց է ուղղվել, թե արդյո՞ք Երևանում ընթացող բողոքի ակցիաները նշանակում են, որ Հայաստանում առկա է քաղաքական ճգնաժամ: 

Ի պատասխան, Միրզոյանը նշել է, որ ինքն ինչքանով հասցրել է հետևել, տեղի ունեցող հանրահավաքների բազմամարդությունը կամ սակավամարդությունը, թերևս, չի խոսում այն մասին, որ այդ հանրահավաքները աջակցություն ունեն ՀՀ քաղաքացիների կողմից:

«Ես այդտեղ ողջախոհության հետ կապված որոշակի հարցեր եմ տեսնում ինքս ինձ համար և կարող եմ ասել նաև՝ ինչու: Նախ՝ այդ քաղաքական ուժերը հնարավորություն ունեն իրենց գործունեությունը ծավալել խորհրդարանում և ամենասուր քննադատության ենթարկել իշխանություններին և ամենասուր հարցերը տալ, որից, ցավոք կամ բարեբախտաբար, նրանք չեն օգտվում. իրենց իրավունքն է կրկին»,- հավելել է Հայաստանի արտաքին գործերի նախարարը:

Այսինքն՝ Լավրովին վերագրվող հայտարարությունը համատեղ ասուլիսի ընթացքում իրականում արել է Արարատ Միրզոյանը:

Ինչ վերաբերում է ՌԴ արտգործնախարարին, ապա նա ասուլիսի ընթացքում որևէ կերպ չի անդրադարձել Երևանում ընթացող ցույցերին: 

Այսպիսով, Արման Բաբաջանյանի պնդումը, թե Սերգեյ Լավրովը խորհուրդ է տվել բողոքի ակցիաներ անող ընդդիմադիրներին վերադառնալ խորհրդարան, սխալ է: Նման հայտարարություն իրականում արել է Արարատ Միրզոյանը:

Լուսինե Ոսկանյան