ԱՊՀ ուրվական զորավարժությունները

Հոկտեմբերի 26-ին Ռուսաստանի պաշտպանության նախարարությունը հայտարարել էր  ԱՊՀ երկրների միասնական հակաօդային պաշտպանության համակարգի զորավարժությունների մեկնարկի մասին, որին, ըստ ՌԴ ՊՆ-ի, մասնակցել էին նաև Հայաստանի զինված ուժերի ավիացիան:

ՌԴ պաշտպանական գերատեսչության կայքում նշված է, որ զորավարժություններում ներգրավված էին  Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի եւ Ուզբեկստանի զինված ուժերի կործանիչ ավիացիայի մոտ 100 ինքնաթիռներ եւ ուղղաթիռներ:

Սակայն, ոչ Հայաստանի, ոչ էլ Ղազախստանի, Ղրղզստանի, Բելառուսի, Ուզբեկստանի կամ  Տաջիկստանի պաշտպանական գերատեսչությունների պաշտոնական կայքերում միասնական զորավարժությունների մասին ոչ մի հաղորդագրություն չկար:

ՀՀ ՊՆ մամուլի խոսնակ Արծրուն Հովհաննիսյանը մեր հետ զրույցում հայտարարեց, որ եթե չկան նման հաղորդագրություններ, ապա Հայաստանը նման զորավարժությունների պարզապես չի մասնակցել: Իսկ ՌԴ ՊՆ-ի մամուլի ծառայությունից հրաժարվեցին որևէ մեկնաբանություն տալ այս հարցի շուրջ:

Այդուհանդերձ, մեր գրավոր հարցմանն ի պատասխան ՀՀ Պաշտպանության նախարարությունից հաստատեցին զորավարժություններին ՀՀ Զինված ուժերի մասնակցությունը: ՊՆ այդ գրությունը, սակայն, նորանոր հարցեր է առաջ քաշում:

Մասնավորապես, ըստ ՊՆ-ի՝ «ՀՀ ԶՈՒ հակաօդային պաշտպանության զորքերի և ավիացիայի ստորաբաժանումները մասնակցել են տվյալ զորավարժությանը, որի սահմաններում առաջադրվել են օդային տարածությունում պետական սահմանի խախտումները կանխարգելելու ու բացառելու, ֆորսմաժորային վիճակում հայտնված օդանավերին օգնություն ցուցաբերելու, ինչպես նաև թռիչքային կարգը խախտող օդանավերի թռիչքները չթույլատրելու խնդիրներ:»:

Սակայն, ինչպես հայտնի է, Հայաստանի ռազմաօդային ուժերը չունեն կործանիչ ավիացիա: Այլ կերպ ասած, հայկական օդուժը չունի գեթ մեկ ինքնաթիռ, որը կկարողանա թիրախավորել այլ ինքնաթիռների: Այդ խնդիրներով զբաղվում են բացառապես հակաօդային զորքերը, իսկ ռազմաօդային ուժերն այստեղ անելիք չունեն (վերջիններս բացառապես աջակցում են ցամաքային զորքերին):

Հետևապես, Պաշտպանության նախարարության՝ ԱՊՀ զորավարժություններին ՀՀ ԶՈւ մասնակցությունը հաստատող գրությունը պարունակում է իրականության հետ տարամիտող տեղեկություններ, ինչը հիմքեր է տալիս կասկածի տակ դնելու այդ գրությունն ու զորավաժություններին ՀՀ ԶՈւ մասնակցությունը: Առավել ևս, որ ռուսական կողմին «դուր չէր գա», եթե Հայաստանի ՊՆ-ն գրավոր կերպով հայտարարեր Ռուսաստանի ՊՆ-ի տարածած ապատեղեկատվության մասին:

Այս սցենարում նաև հասկանալի է դառնում, թե ինչու՞ ՀՀ ՊՆ մամուլի խոսնակը հերքեց այդ զորավարժություններին հայկական կողմի մասնակցությունը:

Հիշեցնենք, որ օրերս բացահայտել էին Ռուսաստանի ՊՆ-ի տարածած Հայաստանին վերաբերվող մեկ այլ ապատեղեկատվություն: