ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Օգոստոսի 18-ին ոստիկանությունը մշակեց և հանրային քննարկման դրեց կառավարության որոշման մի նախագիծ, ըստ որի, առաջարկվում է դադարեցնել Հայաստանի ազգային հերոս Կարեն Դեմիրճյանի այրու ծառայողական մեքենայի տրամադրումը և բնակարանի պահպանությունը։
Նախագիծը հանրային քննարկման դնելուց հետո այն միանգամից հայտնվեց լրատվամիջոցների ուշադրության կենտրոնում, քանի որ Ռիմա Դեմիրճյանը մահացել էր 2021 թ․ դեկտեմբերի 21-ին, իսկ նախագիծը ներկայացվել էր դրանից շուրջ 8 ամիս անց։ Այսինքն, Կարեն Դեմիրճյանի տիկնոջը տրամադրված ծառայողական մեքենան և բնակարանի պահպանությունը, ըստ նախագծի, շարունակել է իրականացվել նրա մահից հետո ավելի քան 8 ամիս։
Ըստ այդմ, մի շարք հարցեր են առաջանում. օրինակ՝ ինչու՞ է բնակարանի պահպանության և ծառայողական ավտոմեքենայի տրամադրման դադարեցման անհրաժեշտությունն առաջացել մահվանից շուրջ 8 ամիս անց, ինչու՞ չի դադարեցվել մահվանից անմիջապես հետո կամ ողջամիտ ժամանակ անց, ի՞նչ ծառայություն է իրականացվել մեքենայով այս ամիսների ընթացքում և որքա՞ն գումար է ծախսվել մեքենայի և բնակարանի պահպանության ծառայության համար։
Այս հարցերի պատասխանները ստանալու համար «Փաստերի ստուգման հարթակը» նախագծի՝ հանրային քննարկման դրվելու հենց հաջորդ օրը պաշտոնական հարցմամբ դիմեց ոստիկանություն։
Ոստիկանությունը տեղյակ չէ, թե որ կառույցն է ծառայողական ավտոմեքենա տրամադրել
Երկու ամիսների ընթացքում ոստիկանությունը չկարողացավ առաջադրված հստակ հարցերին պատասխան տալ։ Օրինակ, այն հարցին, թե ինչու է մեքենայի տրամադրումը և բնակարանի պահպանության ծառայությունը դադարեցնելու անհրաժեշտությունն առաջացել ոչ թե մահից անմիջապես հետո, այլ դրանից 8 ամիս անց, ոստիկանությունը չի պատասխանել։
Փոխարենը տեղեկանում ենք, որ Ռիմա Դեմիրճյանի մահից հետո՝ 8 ամսվա ընթացքում, բնակարանի պահպանության համար ծախսվել է 3․7 մլն դրամ։ Մենք խնդրել էինք նաև տրամադրել 2021 թվականի ծախսերի մասին տեղեկություն, սակայն ոստիկանությունից նշել էին, որ այդ տեղեկությունը չեն կարող տրամադրել, քանի որ ընթանում է ծառայողական քննություն։ Տարակուսելի է, թե ինչ կապ ունի ընթացող ծառայողական քննությունը մեր հայցած տեղեկության տրամադրման հետ։ Ոստիկանության աշխատակիցը մեր զրույցում ևս հրաժարվեց տրամադրել հավելյալ տեղեկություն։
Ինչ վերաբերում է ծառայողական մեքենային, ապա ոստիկանությունից հայտնեցին, որ ծառայողական մեքենայի և վարորդի իրականացրած ծառայության վերաբերյալ հարցադրումները դուրս են ոստիկանության իրավասության սահմաններից։
Ընդ որում, ինչպես նշեցինք, նախագծի հեղինակը հենց ոստիկանությունն է, և եթե անգամ ծառայողական մեքենան ոստիկանությունը չի տրամադրել, ակնկալվում է, որ նախագծի հեղինակ գերատեսչությունը պետք է տեղյակ լիներ, թե որ գերատեսչությունն է տրամադրել այն:։ Ոստիկանության աշխատակիցը մեզ հետ զրույցում հայտնեց, որ ծառայողական «ավտոմեքենան, ամենայն հավանականությամբ, տրամադրել է Ազգային անվտանգության ծառայության պետական պահպանության ծառայությունը»։
Մինչդեռ, ԱԱԾ-ից ստացված պատասխանում ասվում է, որ կառույցը Կարեն Դեմիրճյանի այրուն ծառայողական ավտոմեքենա չի տրամադրել և «Փաստերի ստուգման հարթակի»՝ իրենց հասցեագրված հարցերը ԱԱԾ ՊՊԾ-ի հետ որևէ առնչություն չունեն։
Ի վերջո, դիմեցինք կառավարություն՝ խնդրելով պարզել, թե որ կառույցն է ծառայողական ավտոմեքենա տրամադրել Ռիմա Դեմիրճյանին և ինչ ծառայություն է իրականացրել այդ մեքենան Դեմիրճյանի մահվանից հետո։
Կառավարությունից տեղեկացրեցին, որ Ռիմա Դեմիրճյանի ծառայողական ավտոմեքենան տրամադրել է վարչապետի աշխատակազմը և Դեմիրճյանի մահից հետո ավտոմեքենան վերադարձվել է վարչապետի աշխատակազմ և օգտագործվել է աշխատակազմի ծառայողական նպատակներով։
Կառավարությունից ստացված պատասխանը նոր հարցեր է առաջացնում։ Եթե ծառայողական մեքենան Ռիմա Դեմիրճյանի մահից հետո վերադարձվել է վարչապետի աշխատակազմ, ապա ինչի՞ համար է առաջացել ոստիկանության նախաձեռնած նախագծի անհրաժեշտությունը։
Ոստիկանությունը կա՛մ չի հասկանում մեր հարցը, կա՛մ խուսափում է պատասխանել
Կառավարության պատասխանից հետո պաշտոնական հարցմամբ դիմեցինք ոստիկանություն և խնդրեցինք հայտնել, թե արդյո՞ք ոստիկանությունը նախագիծը ներկայացնելու պահին տեղյակ եղել է, որ ծառայողական ավտոմեքենան արդեն վերադարձված է եղել վարչապետի աշխատակազմին։ Նաև խնդրեցինք պարզաբանել, որ եթե տեղեկացված չեն եղել, ապա ինչու՞ է նախագիծը ներկայացվել առանց պատշաճ տեղեկություն հավաքագրելու։
Ոստիկանությունը մեր հարցերին պատասխանելու փոխարեն գրել է, որ «նախագիծը հանրային քննարկման է ներկայացվել շահագրգիռ մարմիններ ներկայացնելու հետ միաժամանակ։ Հանրային քննարկման ավարտից և շահագրգիռ պետական մարմիններից ստացված նկատառումներն ամփոփելուց հետո նախագիծը կլրամշակվի և կներկայացվի ՀՀ կառավարության քննարկմանը»։
Ոստիկանության աշխատակցի հետ մեր հավելյալ զրույցի արդյունքում հավելյալ տեղեկություն ստանալ չհաջողվեց։
Այսպիսով, ոստիկանությունը հանրային քննարկման է դրել կառավարության որոշման մի նախագիծ, որով նախատեսվում է դադարեցնել Կարեն Դեմիրճյանի այրու ծառայողական մեքենայի տրամադրումը, որն արդեն 8 ամիս է, ինչ վերադարձվել էր կառավարության աշխատակազմ։
Նարեկ Մարտիրոսյան
