Թուրքիայի ՆԳՆ-ն Ստամբուլի պայթյունի համար մեղադրում է քրդական PKK-ին. հայկական հետքի մասին լուրերն անհիմն են

Նոյեմբերի 13-ին Թուրքիայի Ստամբուլ քաղաքի կենտրոնում պայթյուն է տեղի ունեցել, որի հետևանքով, ըստ պաշտոնական տվյալների, կա 6 զոհ և 81 վիրավոր։

Պայթյունից հետո որոշ տելեգրամյան ալիքներում տեղեկություններ շրջանառվեցին, թե ահաբեկչության հեղինակը ASALA (Հայաստանի ազատագրության հայ գաղտնի բանակ) հայկական կազմակերպությունն է, որը գործել է 1975-1997 թվականներին և ներկայումս, փաստացի, գոյություն չունի։

Մասնավորապես, 31,000 հետևորդ ունեցող ռուսալեզու Наш Regnum տելեգրամյան ալիքը հայտնեց, թե իբր «պայթյունի պատասխանատվությունը ստանձնել է ASALA ահաբեկչական կազմակերպությունը»։ 

Լուրը տարածվել էր նաև ադրբեջանական տելեգրամյան ալիքներում և Twitter-ում։ 

Ավելի ուշ, սակայն, հայտնի դարձավ, որ թուրքական հատուկ ծառայությունները ձերբակալել են գործողության հեղինակին։ Ըստ Թուրքիայի ներքին գործերի նախարար Սուլեյման Սոյլուի՝ ահաբեկչության հրամանը ստացվել է Սիրիայի հյուսիսում գտնվող Այն ալ-Արաբից, որտեղ Քուրդիստանի աշխատավորական կուսակցության (PKK) սիրիական կենտրոնակայանն է։ 

PKK-ն Թուրքիայի, ԱՄՆ-ի, ԵՄ-ի և մի շարք երկրների կողմից ճանաչվել է որպես ահաբեկչական կազմակերպություն։

Ավելի ուշ հենց նույն տելեգրամյան ալիքները գրեցին, որ ահաբեկչության հեղինակը քուրդ փաստաբան է, որը Թուրքիայում արգելված PKK-ի անդամ է։ 

Այսպիսով, Ստամբուլում տեղի ունեցած պայթյունը կապ չունի փաստացի գոյություն չունեցող ASALA կազմակերպության հետ։ Դրա հեղինակը, ըստ Թուրքիայի իրավապահ մարմինների, PKK-ի անդամ է։ 

Նարեկ Մարտիրոսյան