Yerevan Today-ը հին «թվեր և փաստեր» է հրապարկել․ աղետի գոտում բնակարան չի ստացել ոչ թե 553, այլ 28 ընտանիք

Դեկտեմբերի 7-ին Yerevan Today կայքը «Ո՞վ և ի՞նչ է արել աղետի գոտին վերացնելու համար. Թվեր և փաստեր» վերտառությամբ հոդվածում պնդել է, թե 553 շահառու ընտանիք դեռևս բնակարան չի ստացել։  

«1988 թվականից մինչև 2008-ը տարբեր, այդ թվում՝ պետության մասնակցությամբ ծրագրերով բնակարան է հատկացվել 60 հազար ընտանիքի, իսկ 2008-ից մեկնարկած պետական ծրագրով բնակարան է ստացել 4839 ընտանիք, իսկ մնացյալ 553-ի հարցը պետք է լուծվի առաջիկա երկու տարիներին, ամեն դեպքում այդպես է ասվել: Հետևությունները թողնում ենք ընթերցողներին»,- գրել է կայքը:

Քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը դեկտեմբերի 6-ին հրավիրված ասուլիսին հայտարարել է, որ աղետի գոտում 2008-ից մեկնարկած պետական աջակցության վերջին ծրագրով շահառու է դարձել Շիրակի, Լոռու և Արագածոտնի մարզերի 5419 ընտանիք:

Ըստ նրա՝ երկրաշարժի հետևանքով անօթևան մնացած 5419 ընտանիքներից 5391-ի բնակարանային խնդիրը լուծվել է․ այդ նպատակով 2008-2021 թթ. 70 մլրդ դրամ է հատկացվել։

«Դեռևս լուծման կարիք ունի Շիրակի մարզի Ջրաձոր համայնքի 28 ընտանիքի բնակարանային խնդիրը: Վերջիններս նախընտրել են, որ իրենց բնակարանային խնդրի լուծումը դիտարկվի Կապսի ջրամբարի շրջակայքում նոր գյուղի կառուցման ծրագրի շրջանակներում: Այսպիսով, կարող ենք ասել, որ բոլոր շահառու ճանաչված ընտանիքների նկատմամբ պետության ձևավորված պարտավորությունները կհամարվեն ավարտված»,- նշել է Արզումանյանը։

Վարչության պետը տեղեկացրել է նաև, որ դեռ կան բնակարանային ապահովման ծրագրից դուրս մնացած ընտանիքներ, որոնք բողոքարկում ու դատական կարգով վերականգնում են իրենց իրավունքը․ 2021 թվականին իրավունքները վերականգնած 16 այդպիսի ընտանիք է եղել:

Նշենք նաև, որ 553 շահառու ընտանիքների մասին տվյալը հին է՝ 2016 թվականի, որը ևս ժամանակին հրապարակվել էր վարչության պետ Արզումանյանի կողմից։ 

Այսպիսով, Yerevan Today-ը հրապարկել է 6 տարվա վաղեմության տվյալ․ աղետի գոտում երկրաշարժի հետևանքով անօթևան մնացած ոչ թե 553, այլ 28 ընտանիք չի ապահովվել բնակարանով։ Եվս 16 այդպիսի ընտանիքներ 2021 թվականին դատական կարգով վերականգնել են իրենց իրավունքները։ 

Նելլի Լազարյան