Փետրվարի 7-ին վարչապետ Նիկոլ Փաշինյանին ներկայացվեց Պետական գույքի կառավարման կոմիտեի 2022 թ. գործունեության հաշվետվությունը։ Մամուլի հաղորդագրությունից տեղեկանում ենք նախորդ տարվա կոմիտեի գործունեության մի քանի ցուցանիշների մասին, մասնավորապես՝ օտարված անշարժ գույքի, տրանսպորտային միջոցների, վարձակալության և այլն։
Մասնավորապես, ըստ հաղորդագրության, «վարձակալության տրված պետական գույքի դիմաց 2022 թվականին հավաքագրվել և պետբյուջե է վճարվել 11 մլրդ դրամ, 2021-ի համեմատ 200%-ով ավելի»։
Հաղորդագրությունը տարածել էին բազմաթիվ լրատվական կայքեր, պատրաստվել էին ռեպորտաժներ։
Ավելի ուշ, սակայն, վարչապետի պաշտոնական կայքում վերոհիշյալ մամուլի հաղորդագրությունը ենթարկվել է փոփոխությունների․ խմբագրված տարբերակում փոփոխվել է վարձակալության տրված գույքի դիմաց հավաքագրված գումարների թիվը՝ 11 մլրդ դրամից դառնալով 470 մլն դրամ։ Սակայն նախորդ տարվա նկատմամբ 200% աճի վերաբերյալ համեմատությունը թողնվել է անփոփոխ։
Միևնույն ժամանակ, կոմիտեի 2021-ի գործունեության արդյունքների հաշվետվությունից տեղեկանում ենք, որ «պետական գույքի վարձակալությունից պետական բյուջե է մուտքագրվել 318․8 մլն դրամ», ինչը նշանակում է, որ այս տարվա 470 մլն դրամ մուտքերը գերազանցում են նախորդ տարվա մուտքերը ոչ թե 200, այլ 147%-ով։
Հատկանշական է նաև այն, որ ո՛չ կոմիտեն և ո՛չ էլ վարչապետի աշխատակազմը որևէ կերպ չեն տեղեկացրել վարձակալությունից ստացված մուտքերի վերաբերյալ մամուլի հաղորդագրությունում արված էական փոփոխությունների մասին։
Սակայն առավել հատկանշական է այն փաստը, որ Պետգույքի կառավարման կոմիտեն հաղորդագրությունը տարածելու հաջորդ օրը՝ փետրվարի 8-ին, իր ֆեյսբուքյան պաշտոնական էջում հրապարակել է վարչապետին ներկայացված հաշվետվության մասին «Լուրերի» պատրաստած ռեպորտաժը, որում վարձակալության դիմաց բյուջե արված մուտքերի վերաբերյալ նշվում է ոչ թե խմբագրված՝ 470 մլն թիվը, այլ 11 մլրդ-ը։
Պետգույքի կառավարման կոմիտեից FIP.am-ին հայտնեցին, որ մամուլի հաղորդագրությունն ի սկզբանե տարածել էր վարչապետի աշխատակազմը։ Կոմիտեից նկատել են, որ հաղորդագրության մեջ կա սխալ, և տեղեկացրել են դրա մասին, իսկ իրենց կայքում տեղադրել են արդեն իսկ ճիշտ հաղորդագրությունը։
Զգուշացումից հետո վարչապետի աշխատակազմը փոփոխել է նախնական տարբերակը, սակայն, ինչպես նշեցինք, նախորդ տարվա նկատմամբ 200 տոկոս աճի վերաբերյալ համեմատությունը թողնվել է անփոփոխ։
Կոմիտեից տեղեկացրեցին նաև, որ 11 մլրդ դրամը ոչ թե գույքի վարձակալությունից, այլ անշարժ գույքի օտարումից պետբյուջե մուտքագրված գումարն է։
Ինչ վերաբերում է տարեկան հաշվետվության՝ կայքում տեղադրվելու մասին հարցին՝ կոմիտեից տեղեկացրեցին, որ այն կայքում հասանելի կլինի «մոտակա օրերին»։
Այսպիսով, փաստենք, որ վարչապետի աշխատակազմը պետգույքի վարձակալությունից ստացված բյուջեի մուտքերի փոխարեն նախ ներկայացրել է օտարումից բյուջե մուտքագրված գումարները, դա ներկայացրել է որպես նախորդ տարվա համեմատ 200 տոկոսանոց աճ, այնուհետև փոփոխել և ներկայացրել է իրական մուտքերը, սակայն նախորդ տարվա համեմատությունը թողել է անփոփոխ, իսկ արված փոփոխության վերաբերյալ որևէ ծանուցում չի արվել։
Սևադա Ղազարյան