Լուսանկարը՝ Photolure
Պաշտոնաթող նախագահ Արմեն Սարգսյանը Թվիթերում գրառում է կատարել Վազգեն Սարգսյանի ծննդյան 64-րդ տարեդարձի առիթով։ Նախկին նախագահը, մասնավորապես, գրել է. «Հայաստանի և Արցախի ազգային հերոս, Գլխավոր շտաբի պետ Վ. Սարգսյանն այսօր 64 տարեկան կդառնար»։
Արմեն Սարգսյանի գրառումը անգլերեն է։ Նա գործածել է «Chief of Staff» արտահայտությունը, որը առաջնային նշանակում է զինված ուժերի գլխավոր շտաբի պետ։ Այլ կիրառումների ժամանակ, սովորաբար, այն նշանակում է «աշխատակազմի ղեկավար»։ Օրինակ, ԱՄՆ նախագահի աշխատակազմի ղեկավարի պաշտոնը կոչվում է White House Chief of Staff։
Իրականում, սակայն, Վազգեն Սարգսյանը երբեք չի եղել Հայաստանի ԶՈԻ ԳՇ պետը։ Նա երկու անգամ եղել է պաշտպանության նախարար՝ 1992-1993 թթ. և 1995-1999 թթ.։ Իսկ 1993-1995 թթ.՝ պետնախարար: 1999-ի հունիսի 11-ից մինչև սպանությունը՝ նույն թվականի հոկտեմբերի 27-ը, նա զբաղեցրել է վարչապետի պաշտոնը։
Ի դեպ, երկու Սարգսյանները համատեղ աշխատել են նույն կաբինետում՝ որպես վարչապետ և ՊՆ նախարար։ Արմեն Սարգսյանը նախագահ Լևոն Տեր-Պետրոսյանի կողմից 1996-ի նոյեմբերին նշանակվել էր վարչապետ, սակայն այդ պաշտոնում նա մնաց ընդամենը չորս ամիս և հեռացավ 1997-ի մարտի սկզբին։ Մինչ օրս կարծիք կա, որ Արմեն Սարգսյանը հեռացավ հենց Վազգեն Սարգսյանի հետ ենթադրյալ տարաձայնությունների պատճառով։
Իսկ Վազգեն Սարգսյանի՝ Հայաստանի և Արցախի հերոս լինելու մասը՝ ճիշտ է։ Նա Արցախի Հերոսի կոչմանն արժանացել է կյանքի ընթացքում՝ 1998-ին, իսկ Հայաստանի ազգային հերոս կոչումը նրան շնորհվել է հետմահու՝ 1999-ի դեկտեմբերի 27-ին։
Հովհաննես Նազարեթյան