Defender-ի ցանկից ՀՀ-ն հեռացվել է ոչ թե Պուտին-Փաշինյան զրույցից ժամեր անց, այլ մեկ օր առաջ․ «5-րդ ալիքի» բանախոսի սխալ պնդումը

«5-րդ ալիքի» «Հարցազրույցի» ապրիլի 11-ի թողարկմանը քաղաքական տեխնոլոգ ներկայացող Վիգեն Հակոբյանը պնդել է, թե ԱՄՆ-ի նախաձեռնած Defender-23 զորավարժություններին մասնակցող երկրների ցանկից Հայաստանի անունը հեռացվել է ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի հեռախոսազրույցից հետո։ 

«․․․Դրանով է պայմանավորված, որ հայտարարվում է և Պենտագոնի կայքում դրվում է՝ մասնակցելու են Defender-23 զորավարժություններին։ Հստակ էդ ամեն ինչը նշված է լինում, և մեկ-երկու ժամ հետո հանկարծ, այն բանից, երբ ՀՀ էսօրվա ղեկավարը խոսում է, օրինակ՝ նույն Վլադիմիր Պուտինի հետ, դրանից հետո Պենտագոնի կայքը այդ բանը, այդ լուրը, լուրը չէ՝ Հայաստան անունը ջնջվում է»,- մասնավորապես, ասել է «5-րդ ալիքի» հյուրը։ 

Ապրիլի 5-ին Պենտագոնի հրապարակած մամուլի հաղորդագրության համաձայն՝ Defender-23 զորավարժություններին մասնակցող ավելի քան 20 երկրների ցանկում հայտնվել էր նաև Հայաստանի անունը։ 

Սակայն հաջորդ օրը՝ ապրիլի 6-ին, հայտնի դարձավ, որ ԱՄՆ պաշտպանության նախարարության վերոհիշյալ հաղորդագրությունը խմբագրվել է․ Հայաստանի անունը հեռացվել է զորավարժություններին մասնակցող երկրների ցանկից։ Իսկ ապրիլի 7-ին,  «Ամերիկայի ձայնի» հայկական ծառայության հարցմանն ի պատասխան, Պենտագոնից պարզաբանում են, որ զորավարժությունների մասնակից երկրների ցանկում Հայաստանի անունն ընդգրկելը «ներքին թիմի թույլ տված վրիպակ էր»։ 

Ապրիլի 7-ին թեմայի վերաբերյալ «Ազատություն» ռադիոկայանին պարզաբանում էր տվել նաև ՀՀ պաշտպանության նախարարության մամուլի քարտուղար Արամ Թորոսյանը՝ նշելով, որ ՀՀ-ն ծրագրում է մասնակցել Եվրոպայում ԱՄՆ ցամաքային զորքերի հրամանատարության կողմից կազմակերպվող երկու այլ զորավարժությունների՝ KFOR (Կոսովոյի ուժեր) և Saber Junction (Միաձուլված սուր) զորավարժություններին:  

Երբ է տեղի ունեցել Փաշինյան-Պուտին հեռախոսազանգը 

Ապրիլի 7-ին ՀՀ վարչապետի պաշտոնական կայքը տարածեց Փաշինյան-Պուտին հեռախոսազրույցի մասին պաշտոնական հաղորդագրությունը։ Նույն օրը՝ Մոսկվայի ժամանակով 12։45-ին, հրապարակվել է հեռախոսազրույցի մասին Կրեմլի պաշտոնական կայքի հաղորդագրությունը։ 

Մինչդեռ, Պենտագոնի կայքից Defender-23 զորավարժություններին մասնակից երկրների ցանկից Հայաստանի անունը հեռացնելու մասին հայտնի է դարձել ապրիլի 6-ին՝ Պուտին-Փաշինյան հեռախոսազրույցից մեկ օր առաջ, և ոչ թե այդ հեռախոսազրույցից «մեկ-երկու ժամ անց», ինչպես պնդում է «5-րդ ալիքի» բանախոսը։ 

Այսպիսով, պնդումը, թե Պենտագոնի կայքից Defender-23 զորավարժություններին մասնակցող երկրների ցանկից Հայաստանի անունը հեռացվել է Պուտին-Փաշինյան հեռախոսազրույցից ժամեր անց, չի համապատասխանում իրականությանը․ ՀՀ-ի անունը հեռացվել է այդ հեռախոսազանգից առնվազն մեկ օր առաջ։ 

Նանե Մանասյան