«Բախմուտը վնասաբեր էր ու դոտացիոն». Զելենսկուն վերագրվող կեղծ մեջբերում՝ հայալեզու ֆեյսբուքում

Ֆեյսբուքի հայալեզու հատվածում անցած հանգստյան օրերին տարածվում էր մի ֆոտոկոլաժ, որում Ուկրաինայի նախագահ Վոլոդիմիր Զելենսկին, իբր, հայտարարում է՝ Բախմուտը, մեկ է, վնասաբեր էր ու դոտացիոն («Бахмут всё равно был убыточный и дотационный»): Տարածվող լուսանկարի բովանդակությունը կեղծ է, ահա թե ինչու. 

Համատեքստ. Պաշտոնական Մոսկվան օրերս հայտարարել է, որ ռուսական զորքերը երկար մարտերից հետո գրավել են Արևելյան Ուկրաինայում գտնվող Բախմուտ քաղաքը: Մինչդեռ Կիևը պնդում է, որ քաղաքն ամբողջությամբ ռուսների վերահսկողության տակ չի անցել:

Մի շարք օգտատերեր, մասնավորապես, քաղտեխնոլոգ ներկայացող Կարեն Քոչարյանը մայիսի 21-ին ֆեյսբուքյան իր էջում կիսվել է Սերգեյ Համբարձումյան անվամբ օգտատիրոջ տարածած կոլաժով՝ գրառմամբ, թե Ուկրաինայի նախագահ Զելենսկին հայտարարել է` «Бахмут всё равно был убыточный и дотационный»: 

Քաղտեխնոլոգը նկարին կից գրել է՝ «Սրանք սաղ copy-paste արած պերսոնաժներ են»:  

Սերգեյ Համբարձումյանի տարածած լուսանկարը և կից գրառումը՝ «Նույն պատմությունը, Զելենսկին ու Նիկոլը մեկը մյուսից կապիկ դուրս եկան», սոցցանցերում լայն տարածում է ստացել։ Ակներևաբար, զուգահեռ է տարվում Զելենսկուն վերագրվող խոսքի և Նիկոլ Փաշինյանի՝ 44-օրյա պատերազմից հետո արած հայտարարության միջև: 

«Իրավունքի և արժեքների գերակայություն» իրավապաշտպան հասարակական կազմակերպության նախագահ հանդես եկող Սարգիս Տեր-Եսայանն էլ, տարածելով տեղեկությունը, գրել էր․ «Բախմուտը դժգույն ու դժբախտ մի քաղաք էր։ Չե՞ք նմանեցնում . Սորոսականների, ծռեր-մռերի սրտի ղեկավարը հազարավոր զոհերով Բախմուտին գնահատական տվեց։ Ահա և արդյունքը թմրամոլներին իշխանության բերելը»։

Իրականում, դեռ 2022-ի գարնանն արված լուսանկարին կից տարածվող տեղեկությունը կեղծիք է։ Որևէ աղբյուր, որը կհաստատեր Ուկրաինայի նախագահին վերագրվող հայտարարության իսկությունը, չկա: 

Մայիսի 21-ին Վլադիմիր Զելենսկուն Հիրոսիմայում G7-ի գագաթնաժողովում լրագրողները հարց են ուղղել՝ Բախմուտը դեռ ուկրաինական բանակի վերահսկողության տա՞կ է, ինչին ի պատասխան Զելենսկին պատասխանում է․ «Կարծում եմ՝ ոչ։ Բայց դուք պետք է հասկանաք, որ այնտեղ ոչինչ չկա, նրանք ամբողջն ավերել են, շենքեր չկան: Ցավոք, սա ողբերգություն է, Բախմուտը կա միայն մեր սրտերում. այնտեղ ամեն ինչ գետնին է հավասարվել. միայն հողն է ու մեծ թվով մեռած ռուսներ: Մեր պաշտպանները մեծ աշխատանք են կատարել, և մենք երախտապարտ ենք նրանց»։ 

Այսպիսով, հայալեզու Ֆեյսբուքում տարածվող՝ Ուկրաինայի նախագահ Վոլոդիմիր Զելենսկուն վերագրվող խոսքերը Բախմուտի «վնասաբեր և դոտացիոն» լինելու վերաբերյալ, կեղծ են:  

Նելլի Լազարյան