ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
en
ру
«Հրապարակ» օրաթերթը հուլիսի 6-ին հրապարակված հոդվածում գրել է ոստիկանության կողմից խոշոր գնման պայմանագրերի մասին։ Խոսքը ոստիկանության Պարեկային ծառայության մեքենաների վերանորոգման պայմանագրերի մասին է, որոնցից մեկը կնքվել է «Տոյոտա Երևան» ընկերության հետ հունիսի 29-ին, մյուսը՝ «Չեխ ավտո» ընկերության հետ հուլիսի 3-ին։ Պայմանագրերից յուրաքանչյուրի արժեքը 50-ական մլն դրամ է։
Հոդվածը մամուլի տեսության բաժնում տարածել են բազմաթիվ կայքեր, մասնավորապես, News.am-ը, 1in.am-ը, Aravot.am-ը BlogNews-ը, ArmDay.am-ը, mamul.am-ը 168.am-ը, Panorama.am-ը, Oragir.News-ը, Aysor.am-ը, Hayeli.am-ը, InfoPort.am-ը և այլք։
Հոդվածում մի շարք մանիպուլյատիվ և սխալ պնդումներ կան։ Մասնավորապես, պայմանագրերից մեկի մասին հոդվածում նշվում է, թե 50 մլն դրամ արժեքով պայմանագիրը նախատեսված է 4 մեքենայի վերանորոգման համար։
Իրականում, սակայն, պայմանագիրը կնքվել է ոչ թե թվով 4 մեքենաների, այլ 4 տեսակի մեքենաների համար։ Հատկանշական է, որ կնքված պայմանագրում նշված է, որ այն վերաբերում է ոստիկանության կողմից 2021-22 թթ․ ձեռք բերված «Տոյոտաների» սպասարկմանը։ Կից ներկայացվել են նաև վերանորոգման համար նախատեսված մեքենաների մակնիշներն ու դրանց վերանորոգվող մասերի գները։
Պայմանագրին կարող եք ծանոթանալ այս հղումով
Սա նշանակում է, որ 50 մլն դրամով վերանորոգվում է ոչ թե 4 մեքենա, այլ նշված 4 մակնիշի մեքենաները (Toyota Camry 2.5, Toyota RAV 4, Toyota Fortuner 2.7, Toyota Fortuner 2.7 MT)։ Դրանք, ըստ պայմանագրի, տարվա ընթացքում անհրաժեշտության դեպքում պետք է վերանորոգվեն «Տոյոտա Երևան» ընկերության կողմից՝ համաձայն գնացուցակի։
Օրինակ, եթե Toyota Camry 2.5 մեքենաներից մեկի համար անհրաժեշտ լինի փոխարինել փոխանցման տուփի յուղը, ապա դա պետք է անի «Տոյոտա Երևան» ընկերությունը, որի համար կվճարվի ֏40 հազար։
Բացի դրանից, եթե տարվա ընթացքում մատակարարի կողմից իրականացված աշխատանքները չգերազանցեն ֏50 մլն-ը, ապա պետությունը կվճարի ոչ թե ֏50 մլն, այլ այնքան, որքան կազմել է մատակարարի կողմից իրականացված ծառայության արժեքը։
Հոդվածում ավելի մանրամասն քննության առարկա է դարձել մյուս պայմանագիրը, որով «Չեխ ավտո» ընկերությունը պարտավորվում է ըստ գնացուցակի սպասարկել 150 «Շկոդա» մեքենաները։
Պայմանագրին կարող եք ծանոթանալ այս հղումով
Ընդ որում, այստեղ ևս, ընկերությունը պարտավորվում է ըստ անհրաժեշտության սպասարկել Պարեկային ծառայության մեքենաներն՝ ըստ գնացուցակի։
Ի դեպ, այս պայմանագրերի դեպքում միանգամայն տրամաբանական է մրցույթն իրականացնել մեկ անձով գնման ընթացակարգով, քանի որ մեքենաների մեծ մասը գտնվում են երաշխիքային սպասարկման մեջ, և բնական է, որ դրանց վերանորոգումը պետք է իրականացնի վաճառողը։
Այսպիսով, կարող ենք փաստել, որ ոստիկանության մեքենաների սպասարկման համար մեկ անձով կատարված երկու գնման գործընթացների մասին «Հրապարակ» օրաթերթի հոդվածը, որը արտատպել են մի շարք այլ լրատվամիջոցներ, մանիպուլյատիվ է մի շարք առումներով․ պայմանագրերից մեկը 4 տեսակի մեքենաների սպասարկման համար է, այլ ոչ թե 4 մեքենաների, ինչպես ներկայացվում է հոդվածում։ Բացի դրանից, մեկ անձով են կատարվում այն գնումները, որոնք վերաբերում են երաշխիքային սպասարկման մեջ գտնվող մեքենաների սպասարկմանը, մանավանդ, որ գնումը կատարվում է հենց վաճառողից, պաշտոնական ներմուծողից կամ սպասարկողից։ Ընդ որում, այս դեպքերում պայմանագրում նշած գումարի չափը չի նշանակում, որ այն պարտադիր ամբողջովին ծախսվելու է․ դա կախված է պայմանագրով նախատեսված ժամանակահատվածում վերանորոգվող մեքենաների վրա կատարվելիք ծախսի չափից։
Սևադա Ղազարյան
