Վահե Ղազարյանը չի կատարել պաշտոնավարման 100-րդ օրը մամուլի ասուլիս հրավիրելու խոստումը

Ներքին գործերի նախարար Վահե Ղազարյանը մարտի 15-ին, հրաժարվելով պատասխանել լրագորղների մի քանի հարցերին, հայտարարել էր, որ իր պաշտոնավարման 100-րդ օրը կանդրադառնա դրանց:

Լրագրողները Ազգային ժողովում նախարարից փորձում էին հետաքրքրվել պարեկների աշխատանքից, վարչապետ Նիկոլ Փաշինյանի նախկին համադասարանցին լինելու և այլ հարցերից:

«Կներեք, էլի սիրելիս, ուշանում եմ: Բերեք սենց պայմանավորվենք, հարգելի լրագրողներ, ես իմ 100 օրը լրանալու հետ կապված ես ձեզ անպայման հրավիրելու եմ մեր մոտ և ինչ հարց էլ լինի մեծ սիրով կպատասխանեմ», — այսպես արձագանքեց լրագրողների հարցերին նախարարը: 

Վահե Ղազարյանը ոստիկանապետ է նշանակվել 2020թ. հունիսի 8-ին, իսկ Ներքին գործերի նախարարության ստեղծումից հետո՝ 2023թ.-ի հունվարի 9-ին նշանակվել է ՆԳ նախարար: 

Հոդվածի հրապարակման պահին Ղազարյանի՝ ՆԳ նախարար նշանակվելուց անցել է 179 օր, սակայն մինչև այժմ Ղազարյանը որևէ ասուլիս չի անցկացրել:

Այսպիսով, ներքին գործերի նախարար Վահե Ղազարյանը չի կատարել իր խոստումը՝ մամուլիս ասուլիս հրավիրել և պատասխանել լրագրողների հարցերին:

Լուսինե Ոսկանյան