Արդարադատության նախարարը խեղաթյուրում է Կոռուպցիայի ընկալման համաթվի տվյալները

Այս տարվա հունվարի 30-ին «Թրանսփարենսի Ինթերնեշնլը» հրապարակեց 2023 թվականի Կոռուպցիայի ընկալման համաթիվը (ԿԸՀ)։ Այն դասակարգում է 180 երկիր և տարածքներ՝ ըստ հանրային ոլորտում կոռուպցիայի ընկալման մակարդակի՝ 0-ից (բացարձակապես կոռումպացված) մինչև 100 (բացարձակապես մաքուր) սանդղակով:

Փետրվարի 1-ի կառավարության նիստին Արդարադատության նախարար Գրիգոր Մինասյանը խեղաթյուրել է Կոռուպցիայի ընկալման համաթվի 2023 թվականի որոշ տվյալներ։ 

«Տարին շատ անբարենպաստ էր կոռուպցիայի դեմ պայքարի առումով, քանի որ, օրինակ, Իռլանդիան և Իսլանդիան մինուս երեք միավոր են, իսկ հարևան Վրաստանը ևս մինուս երեք միավոր է, այդ պատճառով պիտի մեկ միավորը շատ գնահատենք»,- ասել է նա։

Իրականում, Իռլանդիան 2022 թվականին, ինչպես և 2023-ին, 77 միավոր ուներ։ Չնայած դրան, այս երկիրը 2023 թվականին զբաղեցրել է 11-րդ տեղը աշխարհում այն դեպքում, երբ 2022-ին զբաղեցնում էր 10-րդ տեղը։ Իսլանդիայի ցուցանիշը ևս ոչ թե 3, այլ 2 միավորով է պակաս նախորդ տարվա ցուցանիշից՝ 74-ի փոխարեն 72։ Վրաստանի մասին նախարարի նշած տվյալները լիովին համապատասխանում են իրականությանը։ 

Հիշեցնենք, որ Հայաստանը 2022 թվականին 46 միավորով զբաղեցրել էր 63-րդ տեղը աշխարհում։ 2023-ին մեկ միավորով և մեկ հորիզոնականով բարելավել է ցուցանիշը՝ 47 միավորով զբաղեցնելով 62-դ տեղը աշխարհում։

Այսպիսով, Գրիգոր Մինասյանը նիստին խեղաթյուրված և սխալ տվյալներ է տրամադրել, որպեսզի, ինչպես ինքն է ասում, «Հայաստանի մեկ միավորը շատ գնահատվի»։

Արփինե Հովհաննիսյան