ՀՀ-ն նահանջել է կոռուպցիայի ընկալման համաթվում՝ ի հեճուկս կառավարության կանխատեսման

Transparency International միջազգային ոչ կառավարական կազմակերպությունը հրապարակել է կոռուպցիայի ընկալման 2022 թվականի զեկույցը, համաձայն որի՝ Հայաստանը 2021 թվականի համեմատ վատթարացրել է իր դիրքերը։ 

Այսպես, ըստ համաթվի՝ Հայաստանը նախորդ՝ 2021 թվականի ցուցանիշի համեմատ կորցրել է 3 միավոր և 46 միավորով հայտնվել է 63-րդ տեղում՝ նախորդ տարվա 58-րդի փոխարեն։ 

Համաթիվը գնահատվում է 100 նիշանոց սանդղակով․ որքան բարձր է նիշը, այնքան ցուցանիշը դրական է համարվում։ Ինչպես նախորդ, այնպես էլ 2022 թվականի զեկույցում ուսումնասիրությունն իրականացվել է աշխարհի  180 երկրների շրջանում։ 

«Փաստերի ստուգման հարթակը», համադրելով ՀՀ կառավարության՝ 2022 թվականին կոռուպցիայի ընկալման համաթվի վերաբերյալ կանխատեսումը, պարզեց, որ գործադիր մարմինը չի կարողացել իրականացնել իր իսկ կանխատեսումը։ 

Այսպես, «ՀՀ հակակոռուպցիոն ռազմավարությունը և դրա իրականացման 2019-2022 թվականների միջոցառումները» ծրագրի 2-րդ հավելվածի համաձայն՝ 2022 թվականին Transparency International-ի Կոռուպցիայի ընկալման ինդեքսում ՀՀ-ն պետք է 55 միավոր ունենար։ 

Մինչդեռ, 2022-ի համաթվում Հայաստանը ոչ միայն չի հաղթահարել 55 միավորի շեմը, այլ մի բան էլ միավորներ է կորցրել՝ 2021 թվականի 49 միավորի համեմատ 2022-ին 46 միավոր հավաքելով։  

Ընդ որում, հատկանշական է, որ 2020 թվականին՝ Արցախյան երկրորդ պատերազմի և COVID-19-ով պայմանավորված սահմանափակումների տարում, ՀՀ-ն բարելավել էր իր ցուցանիշը՝ 2019-ի 42 միավորի դիմաց 49 միավոր հավաքելով։ Իսկ հետպատերազմյան 2021 թվականին, որն աչքի ընկավ ներքաղաքական անկայունությամբ, ՀՀ-ին հաջողվեց պահպանել այդ ցուցանիշը համաթվում։

Այսպիսով, ի հեճուկս ՀՀ կառավարության հակակոռուպցիոն ռազմավարությամբ ամրագրված կանխատեսման, 2022 թվականին ՀՀ-ն ոչ միայն չի բարելավել, այլ մի բան էլ վատթարացրել է իր դիրքերը Կոռուպցիայի ընկալման ինդեքսում։ 

Նանե Մանասյան