Շարմազանովը սխալվում է․ միջազգային կազմակերպություններն անդրադարձել են Երևանում հունիսի 12-ին բիրտ ուժի կիրառմանը

Հունիսի 25-ին տեղի ունեցած մամուլի ասուլիսի ժամանակ Հանրապետական կուսակցության գործադիր մարմնի անդամ Էդուարդ Շարմազանովը դժգոհել էր, թե հունիսի 12-ին Բաղրամյան պողոտայում հավաքի ժամանակ ոստիկանության գործողությունների վերաբերյալ միջազգային որևէ կազմակերպություն հայտարարություն չի արել։ 

«Հուլիսի 12-ին 30 լուսաձայնային նռնակ է նետվել խաղաղ ցուցարարների վրա, որևէ միջազգային կառույցից մի հատ՝ «պու» լսե՞լ եք։ ՊՊԾ գնդի գրավման ժամանակ, 2016-ին ԱՄՆ դեսպանատունը ցույցը խաղաղ որակեց, ոստիկաններին էլ՝ բոբո, հիմա հակառակն է անում»,- հայտարարել էր Շարմազանովը։

Սակայն Շարմազանովի պնդումը, թե միջազգային ոչ մի կառույց չի արձագանքել հունիսի 12-ին ընդդիմության ցույցը ոստիկանության բիրտ ուժի կիրառմամբ ճնշելուն, չի համապատասխանում իրականությանը։ 

Amnesty International միջազգային իրավապաշտպան կազմակերպությունը հունիսի 14-ին հրապարակել է հայտարարություն՝ «Հայաստան. Փողոցային պայքարի ընթացքում տեղի ունեցած բռնությունը պետք է հետաքննվի» վերնագրով։ Հրապարակման մեջ ներկայացվում է Amnesty International-ի՝ Հարավային Կովկասի հետազոտող Նատալյա Նոզաձեի կարծիքը ցույցերի ժամանակ բռնություն կիրառելու վերաբերյալ։ Մասնավորապես, ասվում է, որ Երևանի վերջին փողոցային ակցիայի ժամանակ բռնության մակարդակը խիստ մտահոգիչ է։ Նաև՝ կոչ է արվում Հայաստանի իշխանություններին անհապաղ և անաչառ հետաքննել տեղի ունեցածը, ներառյալ այն պնդումները, որ ոստիկանությունը կարող է անհարկի կամ բիրտ ուժ կիրառած լինել։

Միևնույն ժամանակ, լրագրողների իրավունքների պաշտպանությամբ զբաղվող հասարակական կազմակերպությունները ևս քննադատել են հունիսի 12-ի ցույցերը։ «Հայաստանում բողոքի ակցիան լուսաբանելիս ոստիկանների նպատակային բռնության հետևանքով լրագրողներ են վիրավորվել»․ այս վերտառությամբ գրառմամբ հունիսի 14-ին հանդես է եկել «Լրագրողներ առանց սահմանների» (Reporters sans frontières) միջազգային կազմակերպությունը։ 

«Հիշեցնում ենք իշխանություններին իրենց միջազգային պարտավորությունների մասին՝ երաշխավորելու լրագրողների պաշտպանությունն իրենց աշխատանքի ընթացքում։ Այս հարձակումների վրա պետք է հնարավորինս շատ ուշադրություն դարձվի, իսկ մեղավորները պետք է պատասխանատվության ենթարկվեն»,- հայտարարության մեջ ասում է կազմակերպության Արևելյան Եվրոպայի և Կենտրոնական Ասիայի գրասենյակի ղեկավար Ժեն Կավելիեն։

Այսպիսով, Էդուարդ Շարմազանովի այն պնդումը, թե միջազգային որևէ կառույց չի անդրադարձել ընդդիմադիր ուժերի կազմակերպած ցույցի ժամանակ ոստիկանական ուժի կիրառմանը, չի համապատասխանում իրականությանը։ 

Արփինե Հովհաննիսյան