Տեղեկատվական պատերազմ՝ հանրահավաքից առաջ. ինչ տեղեկություններ են տարածվել ու հերքվել

Մայիսի 26-ին «Տավուշը հանուն հայրենիքի» նախաձեռնության կողմից կազմակերպված հանրահավաքին ընդառաջ տեղեկատվական պատերազմ է. որոշ լրատվամիջոցներ հանդես են եկել այնպիսի հրապարակումներով, որոնք շատ արագ հերքվել են կառավարող ուժի ու պետական կառույցների կողմից: 

«Փաստերի ստուգման հարթակը» ներկայացնում է մամուլի ընդհանուր պատկերը մայիսի 25-ի մամուլում:

«Տավուշը հանուն հայրենիքի» շարժման առաջնորդ, Հայ-առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանը լրագրողների հետ զրույցում հայտարարել էր, թե ըստ մի քանի աղբյուրից ստացված տեղեկությունների՝ Նիկոլ Փաշինյանի թիմը զբաղված է փոքր ջոկատներ կազմելով։

«Ըստ լուրերի՝ 15-17 հոգանոց խմբեր են կազմում, նաև հայտնի օլիգարխի (ակնարկում է Խաչատուր Սուքիասյանին-խմբ.) գլխավորությամբ, որ սպառնում էր ունեզրկելու, սպանելու, եթե չկա նման բան, թող հերքեն այդ լուրերը։ Նույնիսկ մարտական տրամադրության խմբեր են կազմում՝ ինչ-որ Աշոտ Մկրտչյանի գլխավորությամբ»,- հայտարարել էր Բագրատ սրբազանը՝ կոչ անելով իրավապահներին հետամուտ լինել:

Բագրատ արքեպիսկոպոսի հայտարարությանն ու նաև «Սրբազան պայքար» տելեգրամյան ալիքի տարածած նույնաբովանդակ տեղեկատվությանն ի պատասխան՝ ՆԳՆ-ից «Sputnik Արմենիային» ասել են, որ ոստիկանությունը «ստեղծված ապօրինի ջոկատների» մասին տեղեկություն չի ստացել:

«Հայաստանի Հանրապետությունում պետական կառույցներից բացի, զինված ապօրինի որևէ ստորաբաժանում չի կարող գոյություն ունենալ: Նման ապօրինի ստորաբաժանումներ ստեղծելու ցանկացած փորձ, անգամ իրավապահ համակարգի կողմից, օրենքի սահմաններում կարժանանա ամենախիստ արձագանքի»,- ասել են ՆԳՆ-ից:

«Սրբազան պայքար» տելեգրամյան ալիքում կատարված գրառման վերաբերյալ «Քաղաքացիական պայմանագիր» խմբակցության պատգամավոր Վահագն Ալեքսանյանը սուտ մատնության հատկանիշներով հաղորդում է ներկայացրել դատախազություն։

«Պահանջում եմ, որպեսզի դատախազությունը ստուգի գրառման իսկությունը և եթե հայտնաբերվեն «ապօրինի փոքր ջոկատներ», ապա թող պատասխանատվության ենթարկվեն դրանք կազմողներն ու մասնակիցները, իսկ եթե չհայտնաբերվեն, ապա թող այս կեղծիքը տարածողները ենթարկվեն պատասխանատվության՝ սուտ մատնության համար», — գրել է Ալեքսանյանը «Ֆեյսբուք» սոցիալական ցանցում:

Խաչատուր Սուքիասյանի մամուլի խոսնակ Աննա Մկրտչյանն էլ, անդրադառնալով հայտարարություններին, թե իբր իշխանությունների կողմից խմբավորումներ են հավաքագրվում, որի հետևում կանգնած է Խաչատուր Սուքիասյանը, «Ազատություն» ռադիոկայանի հարցմանն ի պատասխան ասել է՝ «զառանցանքները և անհեթեթությունները մեկնաբանելու իմաստ չենք տեսնում»:

Որոշ լրատվականներ (1, 2) տեղեկություն տարածեցին նաև, թե «Քաղաքացիական պայմանագիր» խմբակցության մի շարք պատգամավորներ այլ պետությունների անձնագրեր ունեն: Ըստ այդ տեղեկության`Հայաստանի Ազգային ժողովի փոխնախագահ Հակոբ Արշակյանը, օրինակ, ունի Ղազախստանի Հանրապետության անձնագիր: 

Հակոբ Արշակյանը, արձագանքելով այդ տեղեկություններին, քաղաքացիներին խնդրել է լինել զգոն, չտրվել սադրանքների և չհավատալ ստերին։

«Հայաստանի դեմ գործի է դրվել հիբրիդային պատերազմի գործիքակազմ` ներքաղաքական հինգերորդ շարասյան և ֆեյքնյուզային դրսևորումներով»,- գրել է Արշակյանը։

Մի քանի տելեգրամյան ալիքներ տեղեկություն են տարածել, թե մայիսի 24-ին Բագրատ Սրբազանի, ՀՀ երկրորդ նախագահ Ռոբերտ Քոչարյանի և ՀՅԴ-ականների մասնակցությամբ փակ հանդիպում է տեղի ունեցել։ Ինչ-որ աղբյուրների հղում անելով՝ գրել են իբր նախատեսվող գործընթացների մասին։

Հանդիպման իսկությունը պարզելու համար Yerevan.Today-ը դիմել է ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանին, որը հերքել է այդ տեղեկությունը։

«Այդ կեղծ տեղեկատվությունը հորինվել է իշխանական ֆեյքային կոյուղում, այդ իսկ պատճառով արձագանքելն անիմաստ է»,- ասել է Բագրատ Միկոյանը։

Ընդդիմադիր «Ազգային ճակատ» տելեգրամյան ալիքն էլ տեղեկություն էր հրապարակել, թե մի շարք զինվորականներ և բարձրաստիճան սպաներ հրաժարվել են հետ քաշվել Տավուշի հայկական դիրքերից և ականազերծում կատարել, ավելին՝ նրանք հրաժարական են ներկայացրել։

ՀՀ պաշտպանության նախարարությունը հերքել է «Զինվորական սպաները հրաժարվում են կատարել Տավուշի դիրքերից հետ քաշվելու հրամանը» վերտառությամբ հրապարակումը՝ կոչ անելով զերծ մնալ զինված ուժերի, զինված ուժերի ղեկավար կազմի, զինծառայողների վերաբերյալ հորինված տարբեր պատմություններ հրապարակելուց, կեղծիք ու ապատեղեկատվություն տարածելուց և հիմք ընդունել բացառապես գերատեսչության պաշտոնական հաղորդագրություններն ու հայտարարությունները:

Սյուզաննա Համբարձումյան