Գառնիկ Դանիելյանը ԱԺ-ից դուրս գալուց հետո սխալ տեղեկություն է փոխանցել հանրությանը

Հունիսի 12-ին Ազգային ժողովում կառավարության հետ հարցուպատասխանից հետո ԱԺ «Հայաստան» խմբակցության պատգամավոր Գառնիկ Դանիելյանը ԱԺ շենքից դուրս գալուց հետո լրագրողների հետ ճեպազրույցում իրականությանը չհամապատասխանող տեղեկություններ է հայտնել խորհրդարանում հնչած հարցուպատասխաններից։ 

Նրան լսում էին նաև Բաղրամյան պողոտայում հանրահավաքի մասնակիցները։ 

Մասնավորապես, ընդդիմադիր պատգամավորը դուրս է եկել ԱԺ շենքից և հայտարարել, թե վարչապետն ասել է, որ Ադրբեջանը Ջերմուկից դուրս չի գալու: Մինչդեռ, վարչապետ Նիկոլ Փաշինյանը միանգամայն հակառակ բովանդակությամբ հայտարարություն էր արել։

«Էսօր ասում եմ՝ Ջերմուկի գլխին կանգնած ա ադրբեջանցին, էդ մեր տարածքը չի՞ արդեն, մոռացա՞ն, որ Ջերմուկը մերն ա, հանձնեցին գնաց։ Հարց ես տալիս, ասում ա՝ շատ լավ հարց ես տալիս, բայց մեր կարմիր գիծն էն ա, որ մենք մի միլիմետր հետ չենք գնալու»,- հայտարարել է պատգամավորը ու եզրակացրել․ «Փաստորեն, Ջերմուկի էդ վերևի հատվածը էլ մերը չի։ Մերը չի համարում, հասկանո՞ւմ եք, մերը չի համարում էդ մարդը»։

Վարչապետ Նիկոլ Փաշինյանը, սակայն, ԱԺ-ում պատասխանելով Ջերմուկում ադրբեջանցիների ներկայության մասին Գառնիկ Դանիելյանի հարցին, հակառակն է պնդել՝ հայտարարելով, որ օկուպացված տարածքների հարցը պաշտոնական Երևանի օրակարգում է։։

«Հենց հիմա ադրբեջանցիները նստած են Ջերմուկ քաղաքից մի քանի կիլոմետր այն կողմ և դրա մասին խոսք չկա»,- դիմելով Փաշինյանին՝ ասել է Դանիելյանը։

Պատգամավորի այս հայտարարությանը, վարչապետը արձագանքել է․ «Մեր օկուպացված տարածքների հարցը երբեք դուրս չենք բերել մեր օրակարգից ու երբեք դուրս չենք բերելու օրակարգից»։

Հասմիկ Համբարձումյան